Video Stories

വാനോളമുയരുന്ന ഇന്ത്യ-റഷ്യ ബന്ധം

Published

6 years ago

October 9, 2018

ഇന്ത്യയും റഷ്യയും തമ്മില്‍ ഒപ്പുവെച്ച എസ് -400 ട്രയംഫ് മിസൈല്‍ സാങ്കേതികവിദ്യാകരാര്‍ നമ്മുടെ പ്രതിരോധ രംഗത്ത് വലിയ പ്രതീക്ഷകള്‍ക്ക് സാധ്യത നല്‍കുന്നുവെന്ന് മാത്രമല്ല, പതിറ്റാണ്ടുകളായി ഇരു രാജ്യങ്ങളും തമ്മില്‍ നിലനില്‍ക്കുന്ന ഊഷ്മളമായ പാരസ്പര്യത്തിലേക്ക് കണ്ണി ചേര്‍ക്കപ്പെടുകകൂടിയാണ് പുതിയ കരാര്‍. 39,000 കോടി രൂപയുടെ കരാര്‍ അനുസരിച്ച് രണ്ടു വര്‍ഷത്തിനകം അഞ്ച് യൂണിറ്റ് പടുകൂറ്റന്‍ അതിസാങ്കേതിക വിദ്യാ മിസൈല്‍ സംവിധാനമാണ് ഇന്ത്യക്ക് റഷ്യ കൈമാറുക. ശത്രുവിമാനങ്ങളില്‍നിന്ന്‌വരുന്ന മിസൈലുകളെ 400 കിലോമീറ്റര്‍ ദൂരത്തുനിന്നുതന്നെ നിര്‍വീര്യമാക്കാന്‍ ഇതിനാകും. റഷ്യന്‍ പ്രസിഡന്റ് വ്‌ളാഡിമിര്‍ പുടിന്‍ നടത്തിയ ഇന്ത്യാസന്ദര്‍ശനത്തിന്റെ ഭാഗമായാണ് വെള്ളിയാഴ്ച ഇത്രയും വലിയ കരാറിന് രൂപം നല്‍കിയതും ഇരുരാജ്യങ്ങളുടെ ഭരണാധികാരികള്‍ തമ്മില്‍ ഒപ്പുവെച്ചതും. ഇന്ത്യയുടെ പ്രതിരോധ രംഗത്ത് കഴിഞ്ഞ ഒരു പതിറ്റാണ്ടോളമായി നിലനില്‍ക്കുന്ന മാന്ദ്യവും അയല്‍ രാജ്യങ്ങളുമായുള്ള ഈ മേഖലയിലെ അസന്തുലിതാവസ്ഥയുമാണ് ഇത്തരമൊരു കരാറിലേക്ക് വഴിവെച്ചത്. ഈ പശ്ചാത്തലത്തില്‍ വരാനിരിക്കുന്ന നാളുകളില്‍ ഇന്ത്യ-റഷ്യ ബന്ധം സുദൃഢമാകുമെന്നതിനുപുറമെ, മറ്റൊരു ലോക വന്‍ശക്തിയായ അമേരിക്കയില്‍നിന്നുള്ള ഭീഷണിയെയും നാം പുതിയ പര്യാലോചനകള്‍ക്ക് വിധേയമാക്കേണ്ടതുണ്ട്.
പുടിനും നരേന്ദ്രമോദിയും തമ്മില്‍ ഒപ്പുവെച്ച ഊര്‍ജവും ഹെലികോപ്റ്ററുകളുമടക്കമുള്ള പുതിയ കരാറുകള്‍ക്ക് പുറമെയാണ് എസ്-400 മിസൈല്‍ സാങ്കേതിക വിദ്യാകൈമാറ്റം. കഴിഞ്ഞ രണ്ടു വര്‍ഷത്തോളമായി തുടര്‍ന്നുവന്ന ചര്‍ച്ചകള്‍ക്കൊടുവിലാണ് ഇത്തരമൊരു കരാറിന് സാധ്യമായത്. ഇന്ത്യ റഷ്യയുമായി നടത്തിവരുന്ന ഇത്തരം വ്യാപാര സഹകരണ ബന്ധങ്ങള്‍ അമേരിക്കയെയും അതിന്റെ പ്രസിഡന്റ് ഡൊണാള്‍ഡ് ട്രംപിനെയും ചൊടിപ്പിക്കുന്നുണ്ടെന്നതിന് തെളിവാണ് കഴിഞ്ഞയാഴ്ച ട്രംപ് നടത്തിയ ഇന്ത്യാ വിരുദ്ധ പ്രസംഗം. ഇന്ത്യ നികുതിയുടെ കാര്യത്തില്‍ രാജാവാണെന്നായിരുന്നു ട്രംപിന്റെ കുറ്റപ്പെടുത്തല്‍. അതിനുമുമ്പുതന്നെ ഇന്ത്യയില്‍നിന്നുള്ള ഇറക്കുമതി വസ്തുക്കള്‍ക്ക് വന്‍തോതില്‍ നികുതി ചുമത്തുകയും ചെയ്തിരുന്നു അമേരിക്ക. അതിന് ഇന്ത്യ അതേ നാണയത്തില്‍ തിരിച്ചടി നല്‍കുകയും ചെയ്തു. എസ് 400 മിസൈല്‍ സാങ്കേതിക വിദ്യ ഇന്ത്യയെ സംബന്ധിച്ചിടത്തോളം വലിയ അനിവാര്യതയായാണ് ഇന്ത്യന്‍ പ്രതിരോധ മേഖല വിലയിരുത്തുന്നത്. ചൈനയും പാക്കിസ്താനുമൊക്കെ മിസൈല്‍ സാങ്കേതിക വിദ്യയില്‍ ഏറെ മുന്നോട്ടുപോകുമ്പോള്‍ അനങ്ങാതിരിക്കാന്‍ നമുക്കാവില്ലതന്നെ. രണ്ടു വര്‍ഷം മുമ്പുതന്നെ ചൈന റഷ്യയില്‍നിന്ന് എസ് 400 മിസൈല്‍ പ്രതിരോധ സംവിധാനം സ്വായത്തമാക്കിയിരുന്നു. അതേതുടര്‍ന്നായിരുന്നു ഇന്ത്യയുടെ നീക്കം. ചൈനയുമായി ദോക്്‌ലാം വിഷയത്തിലും അരുണാചല്‍ പ്രദേശിന്റെയും ലഡാക്കിന്റെയും കാര്യത്തിലും വലിയ തോതിലുള്ള ഭീഷണിയാണ് ഇന്ത്യ ഇപ്പോള്‍ അഭിമുഖീകരിച്ചുകൊണ്ടിരിക്കുന്നത്. ദോക്്‌ലാമില്‍നിന്ന് ചൈന പുറകോട്ടുപോയെന്ന് പറയപ്പെട്ടെങ്കിലും ഇപ്പോഴും അവരുടെ സൈന്യത്തെ അവിടെ വിന്യസിച്ചിട്ടുണ്ടെന്നാണ് മാധ്യമങ്ങള്‍ റിപ്പോര്‍ട്ട് ചെയ്യുന്നത്. ചൈനക്കെതിരെ അമേരിക്ക ഇതിനകം വലിയതോതിലുള്ള ഉപരോധമാണ് ഏര്‍പ്പെടുത്തിയിട്ടുള്ളത്. ട്രംപ് വന്നതിനുശേഷം ഇരു രാജ്യങ്ങളും തമ്മില്‍ രൂക്ഷമായ നികുതി വര്‍ധനാ ഏറ്റുമുട്ടലിലേക്ക് മാറിയിരുന്നു. ഇതെല്ലാം ഒരു കണക്കിന് അമേരിക്കയെ ഇന്ത്യയുമായി കൂടുതല്‍ അടുപ്പിച്ചിട്ടുണ്ടെങ്കിലും കഴിഞ്ഞയാഴ്ചത്തെ പുടിന്‍-നരേന്ദ്ര മോദി ഉച്ചകോടിയും എസ് 400 കരാറും അമേരിക്കന്‍ ഭരണകൂടത്തെ വലിയതോതിലുള്ള അസംതൃപ്തിക്കും അരിശത്തിനും ഇടയാക്കിയിട്ടുണ്ടെന്ന് ന്യായമായും ഊഹിക്കാനാകും. എന്നാല്‍ ഇതില്‍ ഇന്ത്യക്കുള്ള മെച്ചമെന്നുപറയുന്നത് ഒരേസമയം ചൈനയെയും ഇന്ത്യയെയും പിണക്കാന്‍ അമേരിക്കക്കാവില്ലെന്നതാണ്.
ഏഷ്യയിലെ രണ്ടു പ്രബല ശക്തികളും ജനസംഖ്യകൊണ്ട് വലിയ ഉപഭോക്തൃ സാമ്പത്തിക മേഖലയുമായ ഇരുരാജ്യങ്ങളെയും ഒരേ സമയം പിണക്കിയാല്‍ തങ്ങളുടെ സാമ്പത്തികവും സൈനികവുമായ താല്‍പര്യങ്ങള്‍ക്ക് അത് വിലങ്ങുതടിയാകുമെന്ന് അറിയാന്‍ കഴിയാത്ത വരല്ല വൈറ്റ്ഹൗസ് ഭരണകര്‍ത്താക്കള്‍. അവര്‍ അതുകൊണ്ടുതന്നെ ഇന്ത്യ-റഷ്യ കരാറിനെ വളരെ പക്വതയോടെയാണ് വിലയിരുത്തുന്നതും അതിന്മേല്‍ പ്രതികരണം നടത്തിയിരിക്കുന്നതും. റഷ്യയുമായി ഇന്ത്യക്ക് സ്വാതന്ത്ര്യകാലത്ത് തന്നെയുള്ള സാമ്പത്തികവും ആശയപരവുമായ ബന്ധമാണ് ഉള്ളതെന്നത് അമേരിക്കക്ക് മറച്ചുവെക്കാനാവില്ല. പ്രഥമ പ്രധാനമന്ത്രി പണ്ഡിറ്റ് ജവഹര്‍ലാല്‍ നെഹ്‌റുവിന്റെ കാലം മുതല്‍ സോഷ്യലിസ്റ്റ് സമ്പദ് നയങ്ങളും പഞ്ചവല്‍സര പദ്ധതികളും റഷ്യയില്‍നിന്ന് സ്വാംശീകരിക്കുകയും ആയത് ഇക്കഴിഞ്ഞ കാലം വരെ നടപ്പാക്കുകയും ചെയ്ത നാടാണ് ഇന്ത്യ. മോദിയുടെയും പുടിന്റെയും പരസ്പരാശ്ലേഷത്തിനുള്ളില്‍ ആ മഹത് പാരമ്പര്യത്തിന്റെ തികട്ടലുകളുണ്ടെന്നത് വാസ്തവംമാത്രം. ഇനി ചൈനക്കെതിരെ അമേരിക്ക പ്രഖ്യാപിച്ചിട്ടുള്ള ഉപരോധം ഇന്ത്യക്കെതിരായി പ്രയോഗിക്കാതിരിക്കാന്‍ പാക്കിസ്താനോടുള്ള അമേരിക്കന്‍ ബന്ധത്തിന്റെ പശ്ചാത്തലത്തില്‍ കഴിയുമോ എന്നതും സംശയകരമാണ്. അടുത്തിടെയാണ് ട്രംപ് ഭരണകൂടം പാക്കിസ്താനുള്ള 2200 കോടിയുടെ സഹായധനം പിന്‍വലിച്ചതായി പ്രഖ്യാപനം നടത്തിയത്. ഇന്ത്യ ഇപ്പോഴും പാക്കിസ്താന്റെ ഭീകരതക്കുള്ള പിന്തുണയെ അമേരിക്കയെ ഉപയോഗിച്ച് പ്രതിരോധത്തിലാക്കുകയുമാണ്. ഇവിടെയാണ് പെട്ടെന്നൊരു ഭീഷണി ട്രംപില്‍നിന്ന് നമുക്ക് ഭയക്കേണ്ടതില്ലാത്തത്. ഇനി 2020ലാവും എസ് 400 സംവിധാനം ഇന്ത്യയിലേക്ക് പൂര്‍ണമായും എത്തുക എന്ന സവിശേഷതയും കരാറിലുണ്ട്. അതുവരെയെങ്കിലും ഇന്ത്യക്കെതിരെ വിരലനക്കാന്‍ അമേരിക്കക്കാവില്ല. അമേരിക്കയില്‍നിന്ന് മുമ്പ് 13 ലക്ഷം കോടിയുടെ പ്രതിരോധ ഇടപാടുകളാണ് ഇന്ത്യ നടത്തിയിരുന്നതെങ്കില്‍ കാലക്രമേണ റഷ്യക്കാണ് ഇതില്‍ മുന്‍തൂക്കം. ഇന്ത്യയുടെ റഷ്യയുമായുള്ള പ്രതിരോധ ഇടപാട് ഇപ്പോള്‍ 60 ശതമാനത്തോളമാണെങ്കില്‍ അമേരിക്കയുമായി അത് 12 ശതമാനമേ ഉള്ളൂ. മാത്രമല്ല, ഇടക്ക് തെറ്റിപ്പിരിയുന്ന തരത്തിലുള്ള അമേരിക്കന്‍ മോഡല്‍ ബന്ധമല്ല നമുക്ക് റഷ്യയുമായി ഉള്ളത്. ശീതയുദ്ധ കാലത്ത് ചേരിചേരാ നയവുമായി ഇന്ത്യ മുന്നോട്ടുപോയപ്പോള്‍ പോലും നമുക്ക് റഷ്യയുടെ കാര്യത്തിലെന്നും ഒരു കരുതലുണ്ടായിരുന്നു. ചൈനയുമായി ഏറ്റുമുട്ടേണ്ടിവരുമ്പോഴും നാം റഷ്യയെ പൂര്‍ണമായി കൈവിട്ടിരുന്നുമില്ല. കമ്യൂണിസത്തിലെതന്നെ രണ്ടു ധാരകളെ പിന്തുണച്ചവരാണല്ലോ ചൈനയും സോവിയറ്റ് യൂണിയനും. ഇറാന്‍ എണ്ണ ഇറക്കുമതി ഉള്‍പ്പെടെ പശ്ചിമേഷ്യയിലെയും മറ്റും ഇന്ത്യന്‍ താല്‍പര്യങ്ങള്‍ക്ക് കൂടുതല്‍ അനുയോജ്യനായ സുഹൃത്ത് തന്നെയാണ് റഷ്യ. ലോക സമാധാനത്തിന്റെ പുതിയ വിഹായസ്സിലേക്ക് പരസ്പര സഹകരണത്തിലൂടെ ഇരു രാജ്യങ്ങളും കൂടുതല്‍ കരുത്തോടെയും ജാഗ്രതയോടെയും ചരിക്കുമെന്നുതന്നെ പ്രത്യാശിക്കാം.

kerala

സി.പി.എം എന്ന വർഗീയതയുടെ കാളിയൻ

രാഷ്ട്രീയത്തെ ന്യായീകരിക്കാനുള്ള ശ്രമങ്ങള്‍ കുടുതല്‍ അബദ്ധങ്ങളിലേക്ക് നേതാക്കളെ തള്ളിവിടുമ്പോള്‍ ഈ പാര്‍ട്ടിക്കിതെന്തുപറ്റിയെന്ന് സ്വന്തം അണികള്‍ തന്നെ പരസ്പരം ചോദിച്ചുകൊണ്ടിരിക്കുന്ന സാഹചര്യത്തിനാണ് രാഷ്ട്രീയ കേരളം സാക്ഷ്യംവഹിച്ചുകൊണ്ടിരിക്കുന്നത്.

Published

10 hours ago

November 20, 2024

webdesk13

മുന്‍കൂട്ടി തയ്യാറാക്കിയ പൊറാട്ടുനാടകങ്ങളെല്ലാം എട്ടു നിലയില്‍ പൊട്ടുകയും ജനങ്ങളുടെ മുന്നില്‍ തീര്‍ത്തും പരിഹാസ്യരായി മാറുകയും ചെയ്തപ്പോള്‍ കേവല രാഷ്ട്രീയ നേട്ടങ്ങള്‍ക്കായി സംഘ്പരിവാറിനെ നാണിപ്പിക്കുന്ന വര്‍ഗീയ ധ്രുവീകരണത്തിന്റെ മാറാപ്പുപേറുന്ന സി.പി.എമ്മിന്റെ നെറികെട്ട സമീപനം കണ്ട് കേരളം മൂക്കത്തുവിരല്‍ മൂക്കത്തുവിരല്‍ വെച്ചുപോവുകയാണ്. ഈ രാഷ്ട്രീയത്തെ ന്യായീകരിക്കാനുള്ള ശ്രമങ്ങള്‍ കുടുതല്‍ അബദ്ധങ്ങളിലേക്ക് നേതാക്കളെ തള്ളിവിടുമ്പോള്‍ ഈ പാര്‍ട്ടിക്കിതെന്തുപറ്റിയെന്ന് സ്വന്തം അണികള്‍ തന്നെ പരസ്പരം ചോദിച്ചുകൊണ്ടിരിക്കുന്ന സാഹചര്യത്തിനാണ് രാഷ്ട്രീയ കേരളം സാക്ഷ്യംവഹിച്ചുകൊണ്ടിരിക്കുന്നത്.

കേരളം ഇന്നേവരെ സാക്ഷ്യം വഹിച്ചിട്ടില്ലാത്തവിധം അഴിമതിയുടെയും സ്വജനപക്ഷപാതത്തിന്റെയും കൂത്തരങ്ങായി സംസ്ഥാനം മാറിയപ്പോള്‍ ഭരണത്തെക്കുറിച്ച് ഒരക്ഷരംപോലും ഉരിയാടാന്‍ കഴിയാത്ത മുഖ്യമന്ത്രിയും സംഘവും ന്യൂനപക്ഷ ഭൂരിപക്ഷ പ്രീണനങ്ങള്‍ തരാതതരംപോലെ ഉപയോഗിച്ച് കൊണ്ടിരിക്കുകയാണ്. എന്നാല്‍ പഞ്ചതന്ത്രം കഥയിലെ കുറുക്കന്റെ ഈ കുശാഗ്രബുദ്ധി തിരിച്ചറിഞ്ഞ ജനാധിപത്യ വിശ്വാസികള്‍ മൂര്‍ത്താവ് നോക്കി പ്രഹരം നല്‍കിയിട്ടും അതില്‍നിന്നൊന്നും ഒരുപാഠവും പഠിക്കാന്‍ ഇക്കൂട്ടര്‍ക്ക് സാധിച്ചിട്ടില്ല എന്നാണ് പാലക്കാട് ഉപതിരഞ്ഞെടുപ്പ് തെളിയിക്കുന്നത്.

ലോക്‌സഭാ തിരഞ്ഞെടുപ്പില്‍ മുസ്‌ലിം ഭൂരിപക്ഷ പ്രദേശങ്ങളില്‍ പൗരത്വ വിഷയവും ക്രിസ്ത്യന്‍ പ്രദേശങ്ങളില്‍ മണിപ്പൂരുമെല്ലാം ഉയര്‍ത്തിപ്പിടിച്ച് പ്രചണ്ഡമായ പ്രചരണങ്ങള്‍ നടത്തിയെങ്കിലും ഈ കുതന്ത്രങ്ങള്‍ തിരിച്ചറിഞ്ഞ ജനങ്ങള്‍ ലക്ഷോപലക്ഷം വോട്ടുകള്‍ക്കാണ് അവരെ തൂത്തെറിഞ്ഞത്. എന്നിട്ടും പുഴുത്തുനാറിയ ഇതേ തന്ത്രങ്ങള്‍ തന്നെ വീണ്ടുംപയറ്റിക്കൊണ്ടിരിക്കുമ്പോള്‍ ഇടതുമുന്നണി യെന്ന സംവിധാനം എത്തിപ്പെട്ട അപചയം എത്രമേല്‍ ഭീതിതമാണെന്നതാണ് പ്രകടമായിക്കൊണ്ടിരിക്കുന്നത്. പാലക്കാട് ഉപതിരഞ്ഞെടുപ്പില്‍ എത്രമാത്രം പച്ചയായ രീതിയിലാണ് വര്‍ഗീയതയുടെ വിഷവിത്തുകള്‍ സി.പി.എം വിതറിക്കൊണ്ടിരിക്കുന്നത് എന്നതിന്റെ ഏറ്റവും ഒടുവില ത്തെ ഉദാഹരണമാണ് ഇന്നലെ രണ്ടുപത്രങ്ങള്‍ക്ക് നല്‍കിയ പരസ്യങ്ങള്‍. തിരഞ്ഞെടുപ്പു കമ്മീഷന്റെ അനുമതിപോലും നേടാതെ മുസ്‌ലിം സമുദായത്തിലെ രണ്ടു വിഭാഗങ്ങള്‍ നടത്തുന്ന പത്രങ്ങള്‍ക്ക് വര്‍ഗീയ വിഷംചീറ്റുന്ന പരസ്യങ്ങള്‍ നല്‍കിയതിലൂടെ ന്യൂനപക്ഷവോട്ടുകള്‍ സ്വന്തംപെ ട്ടിയിലാക്കാമെന്ന് കരുതുന്ന പിണറായിയും കൂട്ടരും ഈ സമുദായത്തെക്കുറിച്ച് എന്താണ് ധരിച്ചുവെച്ചിരിക്കുന്നത് എന്നതാണ് ബോധ്യമാകാത്തത്.

സി.പി.എം ആര്‍.എസ്.എസ് ബാന്ധവം വ്യത്യസ്ത സാഹചര്യങ്ങളിലായി നിരന്തരം പുറത്തുവന്നുകൊണ്ടിരിക്കുകയും ആ ഡീലിങ്ങിന്റെ അ നന്തരഫലമായി മോദി സര്‍ക്കാറിന്റെ അതേ മാതൃകയില്‍ പതിറ്റാണ്ടുകളുടെ പോരാട്ടത്തിലൂടെ നേടിയെടുത്ത ന്യൂ നപക്ഷങ്ങളുടെ അവകാശങ്ങളുടെ കടക്കല്‍ പിണറായി സര്‍ക്കാറും നിരന്തരമായി കത്തിവെച്ചു കൊണ്ടിരിക്കുകയുമാണ്. ഈ അന്യായത്തിന്റെയും അനീതിയുടെയും പ്രതിഫലനം കൂടിയാണ് ലോക്‌സഭാ തിരഞ്ഞെടുപ്പില്‍ സംസ്ഥാനത്ത് പ്രകടമായത്. ആ യാഥാര്‍ത്ഥ്യത്തെ തിരിച്ചറി ഞ്ഞ് തിരുത്തലുകള്‍ വരുത്തുന്നതിന് പകരം വൈകാരിക വിക്ഷോഭങ്ങള്‍ക്കൊണ്ട് ഒരു സമുദായത്തെ എക്കാലവും വഞ്ചിച്ചുനിര്‍ത്താമെന്നും ബംഗാളിലെയും ത്രിപുരയിലെയും പോലെ അവരെ വണ്ടിക്കാളകളാക്കി മാറ്റാമെന്നുമാണ് സി.പി.എം സ്വപ്‌നംകാണുന്നതെങ്കില്‍ കേരളത്തിലെ ന്യൂനപക്ഷങ്ങളെക്കുറിച്ച് സി.പി.എമ്മിന് ഇനിയും ഒരു ചുക്കും മനസ്സിലായിട്ടില്ല എന്നുമാത്രമേ കരുതാന്‍ കഴിയൂ.

ഒരു ഭാഗത്ത് ന്യൂനപക്ഷങ്ങളുടെ കണ്ണില്‍പൊടിയിടാനുള്ള ശ്രമങ്ങള്‍ നടത്തുമ്പോള്‍ മറുഭാഗത്ത് ഭൂരിപക്ഷ വര്‍ഗീയത ആളിക്കത്തിക്കാനും ഇവര്‍ ഒരുമടിയും കാണിക്കുന്നില്ല. പക്ഷേ അതിനായി രൂപപ്പെടുത്തുന്ന അജണ്ടകളെല്ലാം അമ്പേ പരാജയപ്പെട്ടുപോയി എന്നതാണ് വാസ്തവം. പാണക്കാട് സയ്യിദ് സാദിഖലി ശിഹാബ് തങ്ങള്‍ക്കെതിരെ പിണറായി വിജയന്‍ രംഗത്തെത്തിയത് ഈ അജണ്ടയുടെ ഭാഗമായിരുന്നുവെങ്കില്‍ ആ ഹീനശ്രമങ്ങളെ കക്ഷിരാഷ്ട്രീയങ്ങള്‍ക്കതീതമായി ജനങ്ങള്‍ എതിര്‍ത്തുതോല്‍പ്പിക്കുകയായിരുന്നു. വിഭാഗീയതയുടെയും വിദ്വേഷത്തിന്റെയും വഴിയില്‍ നിന്ന് സ്‌നേഹത്തിന്റെയും സഹിഷ്ണുതയുടെയും മാര്‍ഗത്തിലേക്ക് ഒരാള്‍ കടന്നുവരികയും പുകള്‍പെറ്റ കൊടപ്പനക്കല്‍ തറവാട്ടിലെത്തി അനുഗ്രഹങ്ങളേറ്റുവാങ്ങുകയും ചെയ്യുമ്പോള്‍ ഇടതുപാളയത്തില്‍ നിന്ന് മുഖ്യ മന്ത്രിയുടെ നേതൃത്വത്തില്‍ കൂട്ടനിലവിളികളുയരുന്നതെന്തിനാണെന്ന ജനാധിപത്യകേരളത്തിന്റെ ചോദ്യത്തിന് മുന്നില്‍ സി.പി.എം ഉത്തരംമുട്ടിനില്‍ക്കുകയാണ്. വര്‍ഗീയ തയുടെ കാളിയന്‍മാരായി മാറിയ സി.പി.എമ്മിന്റെ ധ്രുവി കരണ ശ്രമങ്ങള്‍ക്ക് ഏതെങ്കിലും റാന്‍മുളികളുടെ ഒളിഞ്ഞും തെളിഞ്ഞമുള്ള പിന്തുണ ലഭിക്കുന്നുണ്ടാവാം. എന്നാല്‍ ഈ നെറികേടിനെതിരെയുള്ള മതേതര കേരളത്തിന്റെ പ്രതികരണം ഇന്ന് പാലക്കാട് നിയമസഭാ
മണ്ഡലത്തില്‍ വിനിയോഗിക്കപ്പടുമെന്ന കാര്യത്തില്‍ സംശയമില്ല.

Video Stories

മഹാരാഷ്ട്രയും ഝാര്‍ഖണ്ഡും വിധിയെഴുതുന്നു

ക്ഷേമ പദ്ധതികൾക്കുപുറമെ ബി.ജെ.പിയുടെ ഹിന്ദുത്വ മുദ്രാവാക്യങ്ങളും കോൺഗ്രസിന്റെ ജാതിസെൻസസ് വാഗ്ദാനവും ജനങ്ങൾ എങ്ങനെ സ്വീകരിച്ചുവെന്നതിന്റെ പ്രതിഫലനംകൂടിയാകും ഫലം.

Published

10 hours ago

November 20, 2024

webdesk13

നിശ്ശബ്ദ പ്രചാരണവും അവസാനിപ്പിച്ച് മഹാരാഷ്ട്ര വിധിയെഴുതുന്നു. 288 സീറ്റുകളിലേക്ക് 4,136 പേരാണ് ജനവിധി തേടുന്നത്. ശിവസേന, ബി.ജെ.പി, എൻ.സി.പി കൂട്ടുകെട്ടിലെ മഹായുതിയും കോൺഗ്രസ്, ശിവസേന-യു.ബി.ടി, എൻ.സി.പി-എസ്.പി കൂട്ടുകെട്ടിലെ മഹാവികാസ് അഘാഡിയും (എം.വി.എ) തമ്മിലാണ് മുഖ്യ പോരാട്ടം.

ഇത്തവണ 102 സീറ്റുകളിലാണ് കോൺഗ്രസ് മത്സരിക്കുന്നത്. ലോക്സഭ തെരഞ്ഞെടുപ്പിലെ തിരിച്ചുവരവാണ് കോൺഗ്രസിനും എം.വി.എയിലെ മറ്റ് ഘടക കക്ഷികൾക്കും ആത്മവിശ്വാസമേകുന്നത്. ക്ഷേമ പദ്ധതികൾക്കുപുറമെ ബി.ജെ.പിയുടെ ഹിന്ദുത്വ മുദ്രാവാക്യങ്ങളും കോൺഗ്രസിന്റെ ജാതിസെൻസസ് വാഗ്ദാനവും ജനങ്ങൾ എങ്ങനെ സ്വീകരിച്ചുവെന്നതിന്റെ പ്രതിഫലനംകൂടിയാകും ഫലം. ശനിയാഴ്ചയാണ് വോട്ടെണ്ണൽ. ചൊവ്വാഴ്ചക്കകം സർക്കാർ രൂപവത്കരിക്കണം.

ഝാർഖണ്ഡ് നിയമസഭ തെരഞ്ഞെടുപ്പിലെ അവസാന ഘട്ട വോട്ടെടുപ്പും ബുധനാഴ്ച നടക്കും. 38 മണ്ഡലങ്ങളിലേക്കാണ് വോട്ടെടുപ്പ്. മഹാരാഷ്ട്രയിൽ വിമതരുൾപ്പെടെ 2,086 സ്വതന്ത്രരും പ്രാദേശിക പാർട്ടികളും മുന്നണികളിലെ സൗഹൃദ പോരും വിധി നിർണയത്തിൽ മുഖ്യ പങ്കുവഹിക്കും. വിവിധ ജാതി സമുദായങ്ങൾക്കിടയിലെ വിള്ളലും കർഷക രോഷവും പുകയുന്ന മഹാരാഷ്ട്രയിൽ ജനം ആർക്കൊപ്പം നിൽക്കുമെന്ന് മുൻകൂട്ടി പ്രവചിക്കാനാകാത്ത അവസ്ഥ.

ഇരു മുന്നണിയും 170ലേറെ സീറ്റുകൾ കിട്ടുമെന്നാണ് അവകാശപ്പെടുന്നത്. ഭരണം പിടിക്കാൻ 145 സീറ്റ് വേണം. തൂക്കുസഭ സാധ്യതയും പ്രവചിക്കപ്പെടുന്നുണ്ട്. അങ്ങനെ വന്നാൽ പുതിയൊരു രാഷ്ട്രീയ നാടകത്തിനുകൂടി മഹാരാഷ്ട്ര സാക്ഷ്യംവഹിക്കേണ്ടിവരും. ഇരുമുന്നണിയിലെയും ആറ് പാർട്ടികൾക്കും തെരഞ്ഞെടുപ്പ് നിർണായകമാണ്. ഝാർഖണ്ഡിൽനവംബർ 13ന് നടന്ന ആദ്യഘട്ട വോട്ടെടുപ്പിൽ 43 മണ്ഡലങ്ങളിലെ വോട്ടർമാർ വിധിയെഴുതിയിരുന്നു.

നിശബ്ദ പ്രചാരണത്തിന്റെ ദിവസമായ ചൊവ്വാഴ്ച ജെ.എം.എം നേതൃത്വത്തിലുള്ള ഇൻഡ്യ സഖ്യവും ബി.ജെ.പി നേതൃത്വത്തിലുള്ള എൻ.ഡി.എ സഖ്യവും സമൂഹമാധ്യമങ്ങളിലൂടെ പിന്തുണ ഉറപ്പാക്കുന്ന തിരക്കിലായിരുന്നു. മുഖ്യമന്ത്രി ഹേമന്ത് സോറനും സംസ്ഥാനത്ത് ബി.ജെ.പിയുടെ തെരഞ്ഞെടുപ്പ് ചുമതലയുള്ള കേന്ദ്രമന്ത്രി ശിവരാജ് സിങ് ചൗഹാനും ‘എക്സി’ലൂടെ വോട്ടഭ്യർഥന നടത്തി. 1.23 കോടി സമ്മതിദായകരാണ് ബുധനാഴ്ച വോട്ട് രേഖപ്പെടുത്തുന്നത്.

ഇതിൽ 60.79 ലക്ഷം വനിതകളാണ്. 14,000ലധികം പോളിങ് സ്റ്റേഷനുകളാണ് സജ്ജീകരിച്ചിട്ടുള്ളത്. കേരളത്തിനുപുറമെ യു.പി, പഞ്ചാബ്, ഉത്തരാഖണ്ഡ് സംസ്ഥാനങ്ങളിലെ 14 നിയമസഭ മണ്ഡലങ്ങളിലേക്കുമുള്ള ഉപതെരഞ്ഞെടുപ്പ് ബുധനാഴ്ച നടക്കും. 23നാണ് വോട്ടെണ്ണൽ.

News

ഗസ്സയിലെ വംശഹത്യ; ഇസ്രാഈല്‍ പ്രസിഡന്റിന് വ്യോമപാത നിഷേധിച്ച് തുര്‍ക്കി

ഇസ്രാഈല്‍ പ്രസിഡന്റ് ഐസക് ഹെര്‍സോഗിന് COP29ന് പങ്കെടുക്കുന്നതിനായി വിമാനം കടന്ന് പോകാനുള്ള വ്യോമപാത നിഷേധിച്ചാണ് തുര്‍ക്കി പ്രതിഷേധം ശക്തമാക്കിയത്.

Published

1 day ago

November 19, 2024

webdesk13

ഗസയില്‍ വംശഹത്യ തുടരുന്ന ഇസ്രാഈലുമായുള്ള എല്ലാ ബന്ധങ്ങളും അവസാനിപ്പിച്ചെന്ന് പ്രഖ്യാപിച്ചതിന് പിന്നാലെ ഇസ്രാഈല്‍ പ്രസിഡന്റിന് വ്യോമപാത നിഷേധിച്ച് തുര്‍ക്കി. ഇസ്രാഈല്‍ പ്രസിഡന്റ് ഐസക് ഹെര്‍സോഗിന് COP29ന് പങ്കെടുക്കുന്നതിനായി വിമാനം കടന്ന് പോകാനുള്ള വ്യോമപാത നിഷേധിച്ചാണ് തുര്‍ക്കി പ്രതിഷേധം ശക്തമാക്കിയത്.

ഇതേത്തുടര്‍ന്ന് ഹെര്‍സോഗിന് അസര്‍ബൈജാനില്‍ നടന്ന കാലാവസ്ഥ ഉച്ചകോടിയില്‍ പങ്കെടുക്കാന്‍ സാധിക്കാതെ വന്നതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍ സുരക്ഷാ കാരണങ്ങളാലാണ് ഉച്ചകോടിയില്‍ പങ്കെടുക്കാത്തതെന്നാണ് ഇസ്രാഈല്‍ പരിസ്ഥിതി മന്ത്രാലയം ഈ വിഷയത്തില്‍ വിശദീകരണം നല്‍കിയത്.

പ്രസിഡന്റിന്റെ വിമാനം വ്യോമാതിര്‍ത്തിയില്‍ പ്രവേശിക്കാന്‍ തുര്‍ക്കി വിസമ്മതിച്ചതിനാല്‍ ഇസ്രാഈല്‍ പ്രസിഡന്റ് യാത്ര റദ്ദാക്കിയതായി ഞായറാഴ്ച അസര്‍ബൈജാനിലെ ഉദ്യോഗസ്ഥരെ ഉദ്ധരിച്ച് വൈ നെറ്റ് പ്രതികരിച്ചു. കോണ്‍ഫറന്‍സിലെ ബാക്കിയുള്ള ഇസ്രഈല്‍ പ്രതിനിധികള്‍ നവംബര്‍ 11 ന് ജോര്‍ജിയ വഴി ബാക്കുവില്‍ എത്തിയിരുന്നു.

ഇസ്രാഈലില്‍ നിന്ന് അസര്‍ബൈജാന്‍ തലസ്ഥാനമായ ബാക്കുവിലേക്കുള്ള ഏറ്റവും സുരക്ഷിതമായതും എളുപ്പമാര്‍ന്നതുമായ മാര്‍ഗമായിരുന്നു തുര്‍ക്കി വഴിയുള്ളത്. ഗസയിലും ലെബനനിലും ഇസ്രാഈല്‍ സൈന്യം വ്യോമാക്രമണം നടത്തുമ്പോള്‍ ഇസ്രാഈല്‍ പ്രസിഡന്റും പ്രധാനമന്ത്രിയുമെല്ലാം തുര്‍ക്കി വഴിയാണ് വ്യോമമാര്‍ഗം സഞ്ചരിച്ചിരുന്നത്.

എന്നാല്‍ തുര്‍ക്കിയുടെ വ്യോമമാര്‍ഗം വഴി ഇസ്രാഈല്‍ നേതാക്കള്‍ക്ക് യാത്ര അനുവദിക്കേണ്ടതില്ലെന്ന് ഉന്നത വൃത്തങ്ങളില്‍ നിന്ന് അറിയിപ്പ് ലഭിച്ചതായി തുര്‍ക്കി വ്യോമയാന ഉദ്യോഗസ്ഥര്‍ പ്രതികരിച്ചു. എന്നാല്‍ ഈ വിലക്ക് ചര്‍ച്ചയിലൂടെ പരിഹരിക്കാമെന്ന് ഇസ്രഈല്‍ പ്രതീക്ഷിക്കുന്നതായി ഇസ്രാഈല്‍ സര്‍ക്കാറിന്റെ കീഴിലുള്ള കാബിര്‍ ന്യൂസ് റിപ്പോര്‍ട്ട് ചെയ്തിരുന്നു

ഇസ്രഈലുമായുള്ള എല്ലാ ബന്ധങ്ങളും അവസാനിപ്പിക്കുന്നുവെന്ന് തുര്‍ക്കി പ്രസിഡന്റ് റജബ് തയ്യിബ് എര്‍ദോഗാനാണ് കഴിഞ്ഞ ദിവസം പ്രഖ്യാപിച്ചത്. ഗസയില്‍ ഇസ്രാഈല്‍ വംശഹത്യ തുടരുന്ന സാഹചര്യത്തിലാണ് ഇസ്രാഈലുമായുള്ള ബന്ധം അവസാനിപ്പിക്കാന്‍ തുര്‍ക്കി ഭരണകൂടം തീരുമാനിച്ചത്.

‘റജബ് തയ്യിബ് എര്‍ദോഗാന്റ നേതൃത്വത്തിലുള്ള തുര്‍ക്കി റിപ്പബ്ലിക് ഇസ്രഈലുമായി ഒരു ബന്ധവും തുടരില്ല. ഞങ്ങളുടെ ഭരണസഖ്യം ഇസ്രാഈലുമായുള്ള ബന്ധം വിച്ഛേദിക്കുന്ന കാര്യത്തില്‍ ഉറച്ച് നില്‍ക്കുന്നു. ഭാവിയിലും ഇത് അപ്രകാരം തന്നെ തുടരും,’ എര്‍ദോഗന്‍ പറഞ്ഞു.

കഴിഞ്ഞ വര്‍ഷം ഒക്ടോബറില്‍ ഇസ്രാഈല്‍ ഗസയില്‍ അധിനിവേശവും വംശഹത്യയും ആരംഭിച്ചതുമുതല്‍ ഇസ്രാഈലിനു നേരെ ശക്തമായ നിലപാട് സ്വീകരിച്ചിരുന്ന നാറ്റോ രാജ്യമാണ് തുര്‍ക്കി. ഇക്കഴിഞ്ഞ മെയില്‍ ഇസ്രാഈലിനുമേല്‍ തുര്‍ക്കി വ്യാപാര ഉപരോധം ഏര്‍പ്പെടുത്തിയിരുന്നെങ്കിലും നയതന്ത്ര ബന്ധം തുടരുകയായിരുന്നു.

ഇതിന്റെ ഭാഗമായി തങ്ങളുടെ അംബാസിഡറെ ഇസ്രഈലില്‍ നിന്ന് തുര്‍ക്കി തിരിച്ച് വിളിച്ചിരുന്നു. എന്നാല്‍ അന്ന് നയതന്ത്രബന്ധം പൂര്‍ണമായി അവസാനിപ്പിച്ചിരുന്നില്ല. സമാനമായി ഇസ്രാഈലും പ്രാദേശിക സുരക്ഷാ ഭീഷണികള്‍ ചൂണ്ടിക്കാട്ടി കഴിഞ്ഞ വര്‍ഷം അങ്കാറയിലെ ഇസ്രാഈല്‍ എംബസി ഒഴിപ്പിച്ചിരുന്നു.

ഗസയില്‍ ഇസ്രാഈല്‍ നടത്തുന്നത് വംശഹത്യയാണെന്ന് മനുഷ്യാവകാശ സംഘടനകള്‍ അടക്കം അഭിപ്രായപ്പെട്ടപ്പോള്‍ ഇസ്രാഈല്‍ പ്രധാനമന്ത്രി ബെഞ്ചമിന്‍ നെതന്യാഹുവിനെക്കൊണ്ട് വംശഹത്യയുടെ ഉത്തരവാദിത്വം ഏറ്റെടുപ്പിക്കാന്‍ സാധ്യമായതെല്ലാം ചെയ്യുമെന്ന് എര്‍ദോഗാന്‍ കഴിഞ്ഞ ദിവസം പറഞ്ഞിരുന്നു.

ഈ വര്‍ഷമാദ്യം, ഫലസ്തീനെ പിന്തുണച്ച് അന്താരാഷ്ട്ര നീതിന്യായ കോടതിയില്‍ ഇസ്രാഈലിനെതിരായി ഫയല്‍ ചെയ്ത വംശഹത്യ കേസില്‍ തുര്‍ക്കി ഇടപെട്ടിരുന്നു. ടെല്‍ അവീവിനെതിരെ ലോക രാജ്യങ്ങള്‍ ആയുധ ഉപരോധം ഏര്‍പ്പെടുത്തണമെന്നും തുര്‍ക്കി വാദിച്ചിരുന്നു.