തെലങ്കാനയില്‍ ഭാരത് രാഷ്ട്രസമിതിക്ക് തിരിച്ചടി തുടരുന്നു. മറ്റൊരു എം.എല്‍.എ കൂടി പാര്‍ട്ടി വിട്ട് കോണ്‍ഗ്രസില്‍ ചേര്‍ന്നു. ഗഡ്വാള്‍ എം.എല്‍.എ ബന്ദ്‌ല കൃഷ്ണമോഹന്‍ റെഡ്ഡിയാണ് കോണ്‍ഗ്രസിലെത്തിയത്. മുഖ്യമന്ത്രി രേവന്ദ് റെഡ്ഡി തന്റെ വസതിയില്‍ വച്ച് അദ്ദേഹത്തെ പാര്‍ട്ടിയിലേക്ക് സ്വീകരിച്ചു. 4 പേര് കൂടി ഉടനെത്തുമെന്ന് രേവന്ത് റെഡ്ഡി.
ഇതോടെ, കോണ്‍ഗ്രസില്‍ ചേരുന്ന ഏഴാമത്തെ ബി.ആര്‍.എസ് എം.എല്‍.എയാണ് പാര്‍ട്ടി വര്‍ക്കിങ് പ്രസിഡന്റ് കെ.ടി രാമറാവുവിന്റെ അടുപ്പക്കാരന്‍ കൂടിയായ ബന്ദ്‌ല കൃഷ്ണ മോഹന്‍ റെഡ്ഡി.
നേരത്തെ ബി.ആര്‍.എസിന്റെ ആറ് എം.എല്‍.എമാര്‍ പാര്‍ട്ടിവിട്ട് കോണ്‍ഗ്രസില്‍ എത്തിയിരുന്നു. കഡിയം ശ്രീഹരി, ദാനം നാഗേന്ദര്‍, തെല്ലം വെങ്കട്ട് റാവു, പോചരം ശ്രീനിവാസ് റെഡ്ഡി, സഞ്ജയ് കുമാര്‍, കാലെ യാദയ്യ എന്നിവരാണ് കോണ്‍ഗ്രസില്‍ ചേര്‍ന്നിരുന്നത്. കഴിഞ്ഞദിവസം ആറ് എം.എല്‍.സിമാരും ഒരുമിച്ച് കോണ്‍ഗ്രസിലെത്തിയിരുന്നു.
ദാണ്ഡെ വിട്ടല്‍, ഭാനുപ്രസാദ് റാവു, എം.എസ് പ്രഭാകര്‍, ബൊഗാരപ്പു ദയാനന്ദ്, യഗ്ഗ മല്ലേഷം, ബസവരാജു സരയ്യ എന്നിവരാണ് കോണ്‍ഗ്രസില്‍ ചേര്‍ന്നത്. മുതിര്‍ന്ന ബി.ആര്‍.എസ് നേതാവും രാജ്യസഭാ എം.പിയുമായ കെ. കേശവ റാവുവും കഴിഞ്ഞദിവസം കോണ്‍ഗ്രസില്‍ ചേര്‍ന്നിരുന്നു.