കിണറ്റിൽ വീണ പൂച്ചയെ രക്ഷിക്കാൻ ശ്രമിക്കുന്നതിനിടെ ഒരു കുടുംബത്തിലെ അഞ്ച് പേർ മരിച്ചു. മഹാരാഷ്ട്ര അഹമ്മദ് നഗറിലെ വക്കാടിയിലാണ് സംഭവം. പൂച്ച കിണറ്റിൽ വീണത് കണ്ട ഒരാൾ ഇതിനെ രക്ഷിക്കാനായി കിണറ്റിലിറങ്ങി. ശബ്ദം കേൾക്കാതായതോടെ സഹോദരൻമാരായ അഞ്ച് പേർ കൂടി കിണറ്റിലിറങ്ങി.
ഇതിലൊരാൾ അലമുറയിടുന്നത് കേട്ട് ഓടിക്കൂടിയ നാട്ടുകാർ പോലീസിൽ വിവരം അറിയിക്കുകയായിരുന്നു. അഗ്നിരക്ഷാ സേനയും വൈകാതെ സ്ഥലത്തെത്തി. പോലീസും അഗ്നിരക്ഷാ സേനയും ചേർന്ന് നടത്തിയ രക്ഷാപ്രവർത്തനത്തിൽ കിണറ്റിലിറങ്ങിയവരിൽ ഒരാളെ മാത്രമാണ് ജീവനോടെ പുറത്തെടുത്തത്.
അഞ്ച് മണിക്കൂറോളം നീണ്ട ശ്രമത്തിനൊടുവിലാണ് അഞ്ച് മൃതദേഹങ്ങൾ പുറത്തെടുത്തത്. മാലിന്യം അടിഞ്ഞുകൂടി വർഷങ്ങളായി ഉപയോഗശൂന്യമായി കിടന്ന അവസ്ഥയിലായിരുന്നു കിണർ.