വിദേശ വനിത ബംഗളൂരുവിലെ ഹോട്ടലില്‍ മരിച്ച നിലയില്‍. 37 കാരിയായ ഉസ്ബക്കിസ്ഥാന്‍ സ്വദേശിനിയായ സറീനയെയാണ് ബംഗളൂരുവിലെ സേശാദ്രിപുരത്തെ ഹോട്ടല്‍ മുറിയില്‍ മരിച്ച നിലയില്‍ കണ്ടെത്തിയത്.
നാല് ദിവസം മുന്‍പു ടൂറിസ്റ്റ് വീസയിലാണ് സറീന ബെംഗളൂരുവില്‍ എത്തിയത്. ഇന്നലെ ഉച്ചകഴിഞ്ഞ് നാലരയോടെയാണ് ഹോട്ടലിന്റെ രണ്ടാം നിലയിലുള്ള മുറിയില്‍ സറീനയെ ജീവനക്കാര്‍ മരിച്ചനിലയില്‍ കണ്ടെത്തിയത്. ഉടന്‍ തന്നെ ഹോട്ടല്‍ മാനേജര്‍ പൊലീസിനെ വിവരമറിയിക്കുകയും അസ്വാഭാവിക മരണത്തിന് പൊലീസ് കേസെടുക്കുകയും ചെയ്തു.
ശ്വാസം മുട്ടിച്ച് കൊലപ്പെടുത്തിയതാകാമെന്നാണ് പൊലീസിന്റെ പ്രാഥമിക നിഗമനം. മൃതദേഹം പോസ്റ്റ്‌മോര്‍ട്ടത്തിനായി ആശുപത്രിയിലേക്ക് മാറ്റി. അന്വേഷണം ആരംഭിച്ചതായി പൊലീസ് അറിയിച്ചു. ഫോറന്‍സിക് സംഘമെത്തി മുറി പരിശോധിച്ചതായും സിസിടിവി ദൃശ്യങ്ങള്‍ ശേഖരിച്ചതായും പൊലീസ് അറിയിച്ചു.