രാമനാട്ടുകര: ദേശീയപാതയിൽ പെരുമുഖം റോഡ് ജംക്‌ഷനു സമീപം 3 ബസുകൾ കൂട്ടിയിടിച്ച് 18 പേർക്കു പരുക്കേറ്റു. ആരുടെയും പരുക്ക് ഗുരുതരമല്ല.
ഫറോക്കിൽ നിന്നു പരപ്പനങ്ങാടിയിലേക്ക് പോകുകയായിരുന്ന സ്വകാര്യ ബസ് പെട്ടെന്ന് യാത്രാക്കാരെ കയറ്റാന്‍ നിര്‍ത്തിയതോടെ പിന്നാലെ വന്ന ഗുരുവായൂരിലേക്ക് പോകുകയായിരുന്ന കെഎസ്ആർടിസി ബസിന്റെ പിന്നിൽ തൃശൂരിലേക്കു പോകുകയായിരുന്ന സ്വകാര്യ ബസ് ഇടിക്കുകയായിരുന്നു. നിയന്ത്രണം വിട്ടു നീങ്ങിയ കെഎസ്ആർടിസി ബസ് മുന്നിലുളള ബസിലും ഇടിച്ചു.
തൃശ്ശൂർ സ്വദേശി രേശ്മ (21), വെട്ടിച്ചിറ സ്വദേശി റംല (47), കൊപ്പം സ്വദേശി ഷബീർ (42), വെട്ടിച്ചിറ സ്വദേശി ഹംസ (56), വേങ്ങര സ്വദേശി മുഹമ്മദ് ആസിഫ് (27), കോട്ടക്കൽ സ്വദേശി കുഞ്ഞിമുഹമ്മദ് (36), കർണാടക സ്വദേശി മുബാറക്ക് (28), വാലഞ്ചേരി സ്വദേശി ഹൈദർ (36), തൃശ്ശൂർ സ്വദേശി അഭി (22), കോട്ടക്കൽ സ്വദേശി ഹന്ന സുമി (21), കൊല്ലം സ്വദേശി ഷീന (18), ഗുരുവായൂർ സ്വദേശി ഷൈഖ (39), മലപ്പുറം കാടാമ്പുഴ സ്വദേശി അബ്ദുൽ വാഹിദ് (44), പുകയൂർ സ്വദേശി ഷബിലാൻ (24), കൊല്ലം സ്വദേശി മീനാക്ഷി (18), കണ്ണൂർ സ്വദേശി സുമേഷ് (47), കൊൽക്കത്ത സ്വദേശി ഗൗദം വിശ്വേഷ് (48) തുടങ്ങിയവർക്കാണ് പരിക്കേറ്റത്.
കൂട്ടിയിടിയുടെ ആഘാതത്തിൽ ബസിലുണ്ടായിരുന്നവരുടെ മുഖം ഇടിച്ചാണ് മിക്കയാളുകൾക്കും പരിക്കേറ്റത്. ഓടിക്കൂടിയ നാട്ടുകാരും വ്യാപാരികളുമാണ് രക്ഷാപ്രവർത്തനം നടത്തി പരിക്കേറ്റവരെ ആശുപത്രിയിലേക്ക് മാറ്റിയത്.