തിരുവനന്തപുരം: വാട്ടര്‍ അതോറിറ്റിക്ക് ഉപഭോക്താക്കളില്‍ നിന്ന് പിരിഞ്ഞുകിട്ടാനുള്ള കുടിശിക 2064 കോടി രൂപ. മന്ത്രി റോഷി അഗസ്റ്റിന്‍ നിയമ സഭയില്‍ വെളിപ്പെടുത്തിയതാണ് ഇക്കാര്യം. കുടിശിക അടച്ചു തീര്‍ക്കുന്നതിന ഒറ്റത്തവണ തീര്‍പ്പാക്കല്‍ പദ്ധതി നടപ്പാക്കും. ഇതിനായി ജൂലൈ 15 മുതല്‍ സ്വാതന്ത്ര്യദിനമായ ഓഗസ്റ്റ് 15 വരെ സംസ്ഥാനത്തെ മുഴുവന്‍ ജില്ലകളിലും അദാലത്ത് സംഘടിപ്പിക്കുമെന്ന് അദ്ദേഹം പറഞ്ഞു.
ഗാര്‍ഹിക – ഗാര്‍ഹികേതര ഉപഭോക്താക്കള്‍ക്ക് അദാലത്തില്‍ പങ്കെടുത്ത് ബില്ല് അടയ്ക്കാവുന്നതാണ്. അദാലത്തില്‍ എത്തുന്നവര്‍ക്ക് കഴിയുന്നത്ര പിഴ ഒഴിവാക്കി നല്‍കും. ചോര്‍ച്ച മൂലവും മറ്റും പലര്‍ക്കും വലിയ തുക ബില്ലായി ലഭിച്ചിട്ടുണ്ട്. വെള്ളം ഉപയോഗിക്കാത്ത സമയത്ത് മീറ്റര്‍ കറങ്ങുന്നുണ്ടോ എന്ന് ആഴ്ചയില്‍ ഒരിക്കലെങ്കിലും പരിശോധിക്കുക മാത്രമാണ് അനാവശ്യ ബില്ലില്‍ നിന്ന് രക്ഷപ്പെടാനുള്ള വഴി. ഇത്തരം പ്രശ്‌നങ്ങള്‍ ഒഴിവാക്കാന്‍ പ്രീപെയ്ഡ് മീറ്റര്‍ സംവിധാനം അടക്കമുള്ളത് നടപ്പാക്കാന്‍ വാട്ടര്‍ അതോറിറ്റി ശ്രമിക്കുന്നുണ്ട്. ഇതുവഴി റീചാര്‍ജ് ചെയ്ത നിശ്ചിത തുകയ്ക്കു ശേഷം വെള്ളം ഓട്ടോമാറ്റിക്കായി കട്ടാകുന്ന സംവിധാനം നടപ്പാക്കാനാണ് ശ്രമിക്കുന്നത്. വീണ്ടും റീചാര്‍ജ് ചെയ്യുന്ന മുറയ്ക്ക് ജലം ലഭ്യമായി തുടങ്ങുകയും ചെയ്യും.
2024-26 ഓടു കൂടി ജലജീവന്‍ മിഷന്‍ സമ്പൂര്‍ണ പദ്ധതി പൂര്‍ത്തിയാക്കും. കടല്‍ വെള്ളം ശുദ്ധീകരിച്ച് ശുദ്ധജലമാക്കുന്ന പദ്ധതി ഭാവിയില്‍ നടപ്പാക്കേണ്ടിവരും. അത് സംബന്ധിച്ച പ്രാഥമിക നടപടികള്‍ ആരംഭിക്കുമെന്നും കെ.എം സച്ചിന്‍ദേവ്, പി. അബ്ദുള്‍ഹമീദ്, ഡോ. എന്‍ ജയരാജ്, ടി സിദ്ധിഖ്, തിരുവഞ്ചൂര്‍ രാധാകൃഷ്ണന്‍, പി.വി അന്‍വര്‍, വി.ഡി സതീശന്‍, ലിന്റോ ജോസഫ്, എം.കെ.എം അഷ്‌റഫ്, ദലീമ എന്നിവരുടെ ചോദ്യങ്ങള്‍ക്ക് മറുപടിയായി മന്ത്രി പറഞ്ഞു.