വെള്ളച്ചാട്ടത്തില്‍ കുളിക്കുന്നതിനിടെ യുവതികളെ കടന്നുപിടിച്ച 2 പൊലീസുകാരെ കസ്റ്റഡിയിലെുത്തു. പിറവം പാമ്പാക്കുട അരീക്കല്‍ വെള്ളച്ചാട്ടത്തില്‍ കുളിക്കുന്നതിനിടെ കടന്നുപിടിച്ചെന്ന യുവതികളുടെ പരാതിയിലാണ് രണ്ട് പൊലീസുകാരെ കസ്റ്റഡിയിലെടുത്തത്.
ഇന്നലെ വൈകിട്ട് 6 മണിയോടെയാണ് കേസിന് ആസ്പദമായ സംഭവം ഉണ്ടായത്. മൂവാറ്റുപുഴ സ്‌റ്റേഷനിലെ പൊലീസുകാരെയാണ് കസ്റ്റഡിയിലെടുത്തത്. എറണാകുളം സ്വദേശിനികളായ യുവതികള്‍ സുഹൃത്തുക്കള്‍ക്കൊപ്പം വെള്ളച്ചാട്ടത്തില്‍ കുളിക്കുന്നതിനിടെയാണ് പൊലീസുകാര്‍ അപമാനിക്കാന്‍ ശ്രമിച്ചതെന്ന് പരാതിയില്‍ പറയുന്നു.
പൊലീസുകാര്‍ കടന്നുപിടിക്കാന്‍ ശ്രമിച്ചതോടെ യുവതികള്‍ ശക്തമായി പ്രതികരിക്കുകയും ബഹളംവെക്കുകയും ചെയ്തു. യുവതികളുടെ ബഹളം കേട്ട് ഓടിക്കൂടിയ നാട്ടുകാര്‍ പൊലീസുകാരെ തടഞ്ഞുവെച്ചു. ഇതിന് പിന്നാലെ നാട്ടുകാര്‍ വിവരം പൊലീസില്‍ അറിയിച്ചു. സ്ഥലത്തെത്തിയ രാമമംഗലം പൊലീസാണ് യുവതികളെ കടന്നുപിടിക്കാന്‍ ശ്രമിച്ചവരെ കസ്റ്റഡിയിലെടുത്തത്.
പൊലീസ് ഇവരോടെ വിവരങ്ങള്‍ ചോദിച്ച് അറിയാന്‍ ശ്രമിച്ചെങ്കിലും ഇരുവരും പൊലീസ് ആണെന്ന വിവരം ആദ്യം വെളിപ്പെടുത്തിയില്ല. എന്നാല്‍ വിശദമായ ചോദ്യംചെയ്യലിലാണ് മൂവാറ്റുപുഴ പൊലീസ് സ്‌റ്റേഷനിലെ സിവില്‍ പൊലീസ് ഉദ്യോഗസ്ഥരാണ് തങ്ങളെന്ന് ഇവര്‍ പറഞ്ഞത്. അതേസമയം ഇവരുടെ പേരുവിവരം പൊലീസ് വെളിപ്പെടുത്തിയിട്ടില്ല. സംഭവത്തില്‍ അന്വേഷണം നടക്കുകയാണെന്നാണ് രാമമംഗലം പൊലീസ് പറയുന്നത്.