ഇന്ത്യന്‍ ഫുട്‌ബോള്‍ ടീമിന് ഏഷ്യന്‍ ഗെയിംസില്‍ കളിക്കാന്‍ അവസരം നല്‍കണമെന്ന് അപേക്ഷിച്ച് മുഖ്യ പരിശീലകന്‍ ഇഗോര്‍ സ്റ്റിമാക്. ടീമിനെ പങ്കെടുപ്പിക്കേണ്ടതില്ലെന്ന നിലപാട് മാറ്റണമെന്നഭ്യര്‍ത്ഥിച്ച് പ്രധാനമന്ത്രി നരേന്ദ്ര മോദിക്ക് തുറന്ന കത്തയച്ചു. ഇന്ത്യന്‍ ഫുട്‌ബോളിന് ഏഷ്യന്‍ ഗെയിംസ് വളരെ പ്രധാനപ്പെട്ടതാണെന്ന് അദ്ദേഹം കത്തില്‍ ചൂണ്ടിക്കാട്ടുന്നു. പ്രധാനമന്ത്രിക്ക് പുറമെ കേന്ദ്ര കായിക മന്ത്രി അനുരാഗ് താക്കൂറിനും കത്തയച്ചിട്ടുണ്ട്.
‘ബഹുമാനപ്പെട്ട പ്രധാനമന്ത്രിയോട് ഒരു എളിയ അഭ്യര്‍ത്ഥന, ദയവായി ഇന്ത്യന്‍ ഫുട്‌ബോള്‍ ടീമിനെ ഏഷ്യന്‍ ഗെയിംസില്‍ പങ്കെടുക്കാന്‍ അനുവദിക്കൂ. നമ്മുടെ രാജ്യത്തിന്റെ അഭിമാനത്തിനും ത്രിവര്‍ണ്ണ പതാകയ്ക്കും വേണ്ടി ഞങ്ങള്‍ക്ക് പോരാടണം! ജയ് ഹിന്ദ്!”- മോദിക്ക് എഴുതിയ കത്തിന്റെ ചിത്രങ്ങള്‍ പങ്കുവച്ചുകൊണ്ട് ഇഗോര്‍ സ്റ്റിമാക് ട്വിറ്ററില്‍ കുറിച്ചു.
ഒരു ദേശീയ ടീമെന്ന നിലയില്‍, കഴിഞ്ഞ 4 വര്‍ഷമായി കഠിനാധ്വാനം ചെയ്യുകയും, അവിസ്മരണീയമായ നേട്ടങ്ങള്‍ കൈവരിക്കുകയും ചെയ്തു. എല്ലാവരുടെയും പിന്തുണയോടെ മികച്ച പ്രകടനം നടത്താന്‍ കഴിയുമെന്ന് ഞങ്ങള്‍ തെളിയിച്ചു. ഫ്രാന്‍സിലെ എംബാപ്പെയെക്കുറിച്ചുള്ള മോദിയുടെ പ്രസംഗം ഇന്ത്യന്‍ ഫുട്‌ബോളിനെക്കുറിച്ച് ചിന്തിക്കുന്ന എല്ലാ ആരാധകര്‍ക്കും പ്രചോദനം നല്‍കി. 2017 ലെ അണ്ടര്‍ 17 ലോകകപ്പ് കളിച്ച ടീം അണ്ടര്‍ 23 ലോകകപ്പ് യോഗ്യതാ മത്സരങ്ങളിലും മിന്നുന്ന പ്രകടനം കാഴ്ചവച്ചു എന്ന വസ്തുത മറക്കരുത്. എല്ലാ അര്‍ത്ഥത്തിലും ഏഷ്യന്‍ ഗെയിംസില്‍ പങ്കെടുക്കാന്‍ ഈ ടീം അര്‍ഹരാണ്-അദ്ദേഹം കുറിച്ചു.
കായിക മന്ത്രി അനുരാഗ് താക്കൂറുമായി താങ്കള്‍ സംസാരിക്കണം. പ്രധാനമന്ത്രി ഇടപെട്ട് ഇന്ത്യന്‍ ടീമിനെ ഏഷ്യന്‍ ഗെയിംസില്‍ പങ്കെടുപ്പിക്കണം. മനോഹരമായ ഗെയിമിനായി 1 ബില്യണ്‍ ഇന്ത്യക്കാരുടെ പ്രതീക്ഷകളും പ്രാര്‍ത്ഥനകളും നമുക്കൊപ്പമുണ്ട്. താഴ്ന്ന റാങ്കിലുള്ള ടീമിന് മുന്‍നിര ടീമുകളെ തോല്‍പ്പിക്കാന്‍ അവസരമുള്ള കളിയാണ് ഫുട്‌ബോള്‍ എന്നതിന് ചരിത്രം സാക്ഷിയാണ്. റാങ്കിംഗിന്റെ അടിസ്ഥാനത്തില്‍ ഇന്ത്യന്‍ ടീമിനെ തഴയുന്നത് ശരിയല്ലെന്നും ഇഗോര്‍ സ്റ്റിമാക് കത്തില്‍ പറയുന്നു. തുടര്‍ച്ചയായ രണ്ടാം തവണയും ഇന്ത്യക്ക് ഏഷ്യന്‍ ഗെയിംസില്‍ അവസരം ലഭിക്കില്ലെന്ന് റിപ്പോര്‍ട്ടുകള്‍ ഉണ്ടായിരുന്നു.
ഏഷ്യയിലെ മികച്ച 8 ടീമുകളില്‍ ഒന്നാണെങ്കില്‍ മാത്രമെ ഏത് ഇനമായാലും ഏഷ്യന്‍ ഗെയിംസിന് അയക്കൂ എന്നാണ് കായിക മന്ത്രാലയത്തിന്റെ മാനദണ്ഡം. ഇതില്‍ വരാത്തതിനാല്‍ ആണ് ഇന്ത്യന്‍ ഫുട്‌ബോള്‍ ടീമിന് തുടര്‍ച്ചയായി രണ്ടാം തവണയും ഏഷ്യന്‍ ഗെയിംസ് നഷ്ടമാകാന്‍ പോകുന്നത്. നിലവില്‍ ഏഷ്യന്‍ ഫുട്‌ബോള്‍ കോണ്‍ഫെഡറേഷന്റെ കീഴിലുള്ള രാജ്യങ്ങളില്‍ 18-ാം സ്ഥാനത്താണ് ഇന്ത്യ. എങ്കിലും ഇന്ത്യന്‍ ഫുട്‌ബോള്‍ ടീമിന് ഇളവ് നല്‍കണം എന്ന് കായിക മന്ത്രാലയത്തോട് അഭ്യര്‍ത്ഥിക്കുമെന്ന് എ.ഐ.എഫ്.എഫ് അറിയിച്ചിരുന്നു.