ബി.ജെപിയുടെ ദുര്‍ഭരണത്തിനെതിരെ മുസ്ലിം യൂത്ത് ലീഗ് മഹാറാലിയില്‍ പ്രതികരിച്ച് സയ്യിദ് സാദിഖലി ശിഹാബ് തങ്ങള്‍. രാജ്യം ഭരിക്കുന്നവര്‍ വിദ്വേഷം പ്രചരിപ്പിക്കുന്നു, അവരതിന് ബാബരി മസ്ജിദ് തകര്‍ത്ത് രാമക്ഷേത്രത്തെയാണ് കൂട്ടുപിടിച്ചതെന്ന് അദ്ദേഹം പറഞ്ഞു. ശ്രീരാമനെ ഞങ്ങളെല്ലാവരും അംഗീകരിക്കുന്നുണ്ട്. ശ്രീരാമന്‍ മനുഷ്യസ്‌നേഹിയായിരുന്നു. എന്നാല്‍ ആ മഹാനെ രാഷ്ട്രീയ വിജയത്തിന് വേണ്ടി ദുരുപയോഗം ചെയ്യുകയാണ് ബിജെപി. തിരൂരില്‍ ജനിച്ച തുഞ്ചത്തെഴുത്തച്ഛനിലൂടെ മനോഹരമായ മലയാള ഭാഷയിലാണ് അധ്യാത്മ രാമായണം എഴുതപ്പെട്ടത്. അതില്‍ പരാമര്‍ശിച്ച രാമനെ ഞങ്ങളും ബഹുമാനിക്കുന്നുണ്ട്. എന്നാല്‍ ബിജെപിയുടെ രാഷ്ട്രീയ രാമനെയാണ് ഞങ്ങളെതിര്‍ക്കുന്നതെന്ന് അദ്ദേഹം വ്യക്തമാക്കി.
രാമക്ഷേത്രത്തിന് മുസ്ലിം സമൂഹം എതിരല്ല. അതേസമയം ബി.ജെ.പി ഇതിനെ രാഷ്ട്രീയമായി ഉപയോഗിക്കുമ്പോള്‍ ആ കാപട്യം രാജ്യത്തിന് മുമ്പില്‍ തുറന്ന് കാണിക്കേണ്ടത് മുസ്ലിം ലീഗിന്റെ കടമയാണ്. ഈ ക്ഷേത്ര വിശുദ്ധിയെ രാഷ്ട്രീയ ധ്വസനം നടത്താന്‍ വൈകാരികതയെ ചൂഷണം ചെയ്യുകയാണ്. ഇത് കാണാതിരിക്കാന്‍ മുസ്ലിം ലീഗിന് കഴിയില്ല. അതുകൊണ്ട് ജനാധിപത്യത്തെ നിലനിര്‍ത്താന്‍ ഇന്ത്യാ മുന്നണിയെ ശക്തിപ്പെടുത്തണം. ഒന്നാഞ്ഞുപിടിച്ചാല്‍ ബിജെപിയെ അടുത്ത തിരഞ്ഞെടുപ്പില്‍ തൂത്തെറിയാന്‍ പ്രയാസമുണ്ടാവില്ലെന്ന് അദ്ദേഹം പ്രതികരിച്ചു.
വിദ്വേഷത്തെ സ്‌നേഹം കൊണ്ടും സാഹോദര്യം കൊണ്ടും നേരിടുകയെന്നതാണ് മുസ്ലിം ലീഗിന്റെ നയം. ഇബ്രാഹിം നബിയും മൂസാനബിയും അതാണ് കാണിച്ചുതന്നത്. അതു തന്നെയാണ് മുസ്‌ലിംലീഗിന്റെ പൂര്‍വ്വസൂരികളായ നേതാക്കളും കാണിച്ച് തന്നതെന്ന് അദ്ദേഹം ഓര്‍മ്മിപ്പിച്ചു.