തിരുവനന്തപുരം: സംസ്ഥാനത്തെ സ്വിഗ്ഗി ജീവനക്കാരുടെ അനിശ്ചിതകാല സമരം താത്കാലികമായി അവസാനിപ്പിച്ചു. തൊഴില്‍ മന്ത്രിയുമായി ചര്‍ച്ച നടത്താമെന്ന ഉറപ്പിലാണ് സമരം നിര്‍ത്തിയത്. ജോലി സുരക്ഷ, വേതന പരിഷ്‌കരണം തുടങ്ങിയ ആവശ്യങ്ങള്‍ ഉന്നയിച്ചായിരുന്നു സമരം. സ്വിഗ്ഗി ഇന്‍സ്റ്റമാര്‍ട്ട് സ്‌റ്റോറികളിലേക്ക് തൊഴിലാളികള്‍ മാര്‍ച്ച് നടത്തിയിരുന്നു.
ഡെലിവറി ചാര്‍ജ് കുറച്ച നടപടിയില്‍ പ്രതിഷേധിച്ചായിരുന്നു തൊഴിലാളികള്‍ അനിശ്ചിതകാല സമരം ആരംഭിച്ചത്. ആദ്യഘട്ടത്തില്‍ തിരുവനന്തപുരം, കോഴിക്കോട് ജില്ലകളിലയിരുന്നു സമരം. അതിനിടെയായിരുന്നു വേതന വര്‍ധന ആവശ്യപ്പെട്ട സ്വിഗ്ഗി ജീവനക്കാരന് മര്‍ദ്ദനമേറ്റത്. സിഐടിയു സംസ്ഥാന വൈസ് പ്രസിഡന്റ് അമീനാണ് മര്‍ദനമേറ്റത്. മാനേജ്‌മെന്റിന്റെ ആളുകളാണ് മര്‍ദിച്ചതെന്ന് ജീവനക്കാര്‍ പറഞ്ഞു. സമരം ഒത്തുതീര്‍പ്പാക്കാമെന്ന് പറഞ്ഞ് വിളിച്ചുവരുത്തിയ ശേഷമായിരുന്നു മര്‍ദനമെന്നാണ് പരാതി. തലപൊട്ടിയ നിലയില്‍ അമീനെ ആശുപതിയില്‍ പ്രവേശിപ്പിച്ചിരിക്കുകയാണ്.