കാട്ടാക്കട കോളേജിലെ എസ്.എഫ്.ഐ ആള്‍മാറാട്ടത്തിന് കൂട്ടു നിന്ന പ്രിന്‍സിപ്പല്‍ ജി.ജെ ഷൈജുവിന് സസ്‌പെന്‍ഷന്‍. നടപടിയെടുക്കാന്‍ നിര്‍ദേശിച്ച് കേരള സര്‍വകലാശാല രജിസ്ട്രാര്‍ കോളേജ് മാനേജ്‌മെന്റിന് കത്ത് നല്‍കിയിരുന്നു. ചട്ടങ്ങള്‍ അനുസരിച്ചുള്ള ഉചിതമായ നടപടി സ്വീകരിച്ച് സര്‍വകലാശാലയെ അറിയിക്കാനാണ് നിര്‍ദേശം നല്‍കിയത്.
പ്രിന്‍സിപ്പലിനെതിരെ നടപടി സ്വീകരിച്ചില്ലെങ്കില്‍ കോളേജിന്റെ അഫിലിയേഷന്‍ റദ്ദാക്കുന്നത് ഉള്‍പ്പെടെയുള്ള തുടര്‍നടപടികളുണ്ടാകുമെന്നും സര്‍വകലാശാല അറിയിച്ചിരുന്നു. യൂണിവേഴ്‌സിറ്റി യൂണിയന്‍ കൗണ്‍സിലര്‍ തിരഞ്ഞെടുപ്പുമായി ബന്ധപ്പെട്ടുണ്ടായ ആള്‍മാറാട്ടം, വ്യാജരേഖ ചമക്കല്‍, കേരള സര്‍വകലാശാലയെ തെറ്റിദ്ധരിപ്പിക്കല്‍ എന്നിവര്‍ക്ക് എന്നിവക്ക് ജി.ജെ ഷൈജു എസ്.എഫ്.ഐ നേതാവ് എ വിശാഖിന് കൂട്ടുനിന്നു എന്നാണ് സിന്‍ഡിക്കേറ്റ് യോഗം വിലയിരുത്തിയത്. തിരഞ്ഞെടുപ്പുമായി ബന്ധപ്പെട്ട കാര്യങ്ങള്‍ അറിയിക്കാന്‍ സര്‍വകലാശാല നിര്‍ദേശിച്ചതിനെ തുടര്‍ന്ന് കോളേജ് അന്വേഷണ സമിതിയെ നിയോഗിച്ചിട്ടുണ്ട്.