മലപ്പുറം: പെരിന്തല്‍മണ്ണ അങ്ങാടിപ്പുറത്ത് ഗതാഗത കുരുക്കിനിടയില്‍ വണ്‍വേ തെറ്റിച്ച് ഊരാക്കുടുക്ക് തീര്‍ത്ത ബസിനെ പിന്നോട്ടെടുപ്പിച്ച് നാട്ടുകാരും മറ്റ് ഡ്രൈവര്‍മാരും. അങ്ങാടിപ്പുറം മേല്‍പ്പാലത്തിന് സമീപം ആ സമയത്ത് വന്‍ ഗതാഗത കുരുക്കാണ് അനുഭവപ്പെട്ടത്. ഇതിനിടയില്‍ നിയമം പാലിക്കാതെ വണ്‍വേ തെറ്റിച്ച് കൂടുതല്‍ ഗതാഗതക്കുരുക്കിന് ഇടയാക്കി ബസ് മുന്നോട്ട് പാഞ്ഞ് എത്തുകയായിരുന്നു.
കോഴിക്കോട്-പാലക്കാട് റൂട്ടില്‍ സര്‍വീസ് നടത്തുന്ന സ്വകാര്യ ബസാണ് നിയമം തെറ്റിച്ചത്. മറ്റ് വാഹന ഡ്രൈവര്‍മാരും യാത്രക്കാരും ചേര്‍ന്ന് ബസിനെ ഒടുവില്‍ പിന്നോട്ട് എടുപ്പിക്കുകയായിരുന്നു. അങ്ങാടിപ്പുറം ഭാഗത്ത് നിന്ന് വരികയായിരുന്ന ബസാണ് കുരുക്കിനിടെ അമിത വേഗതയില്‍ എതിര്‍ ദിശയില്‍ വന്ന് മറ്റ് വാഹനങ്ങള്‍ക്ക് പോകാന്‍ കഴിയാത്ത വിധം കുരുക്കുണ്ടാക്കിയത്. ഡ്യൂട്ടിയിലുണ്ടായിരുന്ന പൊലീസ് നിരവധി തവണ ബസ് പിന്നോട്ട് എടുക്കാന്‍ പറഞ്ഞെങ്കിലും ഡ്രൈവര്‍ കൂട്ടാക്കിയില്ല. തുടര്‍ന്ന് മറ്റ് വാഹനങ്ങളിലെ ഡ്രൈവര്‍മാര്‍ ഇടപെട്ട് ബസ് പിന്നോട്ടെടുപ്പിക്കുകയായിരുന്നു.