റേഷന്‍ കടയിലേക്ക് പന്നി പാഞ്ഞുകയറി’ അഞ്ച് വയസുകാരി ഉള്‍പ്പടെ രണ്ട് പേര്‍ക്ക് പരിക്ക്. മീങ്കര പാറമേട് ലക്ഷമണന്റെ മകന്‍ ശരവണന് (17), ആട്ടയാമ്പതി ഐശ്വര്യ കോളനിയില്‍ കാര്‍ത്തിയുടെ മകള്‍ ആദ്യ(5) എന്നിവര്‍ക്കാണ് പരിക്കേറ്റത്. ഇതില്‍ ആദ്യയുടെ പരിക്ക് ഗുരുതരമാണ്.
ഇന്ന് വൈകീട്ട് ആട്ടയാമ്പതി ജംങ്ഷനിലെ റേഷന്‍ കടയില്‍ അരിവാങ്ങാന്‍ എത്തിയവര്‍ക്കുനേരെയാണ് പന്നിയുടെ ആക്രമണമുണ്ടായത്. മംഗലം-ഗോവിന്ദാപുരം റോഡിലൂടെ പോവുകയായിരുന്ന ഭിന്നശേഷിക്കാരന്റെ സ്‌കൂട്ടറില്‍ ഇടിച്ച പന്നി റോഡിനുമറുവശത്തെ റേഷന്‍ കടയിലേക്ക് ഓടി കടയില്‍ നിന്നവരെ ആക്രമിക്കുകയായിരുന്നു.
അതിവേഗത്തില്‍ വന്ന പന്നി ആദ്യയെ ഇടിച്ചുത്തെറിപ്പിച്ച ശേഷമാണ് ശരവണനെ കുത്തിപ്പരിക്കേല്‍പ്പിച്ചത്. അമ്മയോടൊപ്പമായിരുന്നു ആദ്യ റേഷന്‍ കടയില്‍ വന്നത്. ആദ്യയുടെ തലക്കും മുതുകിലും കൈകള്‍ക്കും പരിക്കുണ്ട്. ശരവണന് തുടയ്ക്കാണ് പരിക്കറ്റത്. ഇവരെ മുതലമട, കൊല്ലങ്കോട് ആശുപത്രിയില്‍ പ്രവേശിപ്പിച്ചു.