ഒഡീഷ ആരോഗ്യ മന്ത്രിയും ബിജെഡി നേതാവുമായ നബ ദാസിനെ വെടിവെച്ചയാളെ തിരിച്ചറിഞ്ഞു. എഎസ്‌ഐ ഗോപാല്‍ ദാസാണ് മന്ത്രിക്ക് നേരെ വെടിവച്ചത്. ഇയാള്‍ എന്തിന് വേണ്ടിയാണ് മന്ത്രിയെ ആക്രമിച്ചതെന്ന് വ്യക്തമല്ല. നാട്ടുകാര്‍ ചേര്‍ന്ന് ഇയാളെ പിടികൂടി പൊലീസിനെ ഏല്‍പ്പിച്ചു. പ്രതിയെ ചോദ്യം ചെയ്തു വരികയാണ്.
വെടിയേറ്റ മന്ത്രിയുടെ നില ഗുരുതരമാണ്. ജാര്‍സുഗുഡയില്‍ നിന്ന് മന്ത്രിയെ എയര്‍ലിഫ്റ്റ് വഴി ഭുവനേശ്വറില്‍ എത്തിച്ചു. വിദഗ്ധ ചികിത്സയുടെ ഭാഗമായി മന്ത്രിയെ അപ്പോളോ ആശുപത്രിയിലേക്ക് മാറ്റും. ജര്‍സുഗുഡ ജില്ലയില്‍ ബ്രജരാജ് നഗറിലാണ് സംഭവം. ബ്രജരാജ് നഗര്‍ ഗാന്ധി ചൗക്കില്‍ വച്ച് പൊതുപരിപാടിയില്‍ പങ്കെടുക്കാനായി കാറില്‍ നിന്ന് ഇറങ്ങുന്നതിനിടയിലാണ് പൊലീസ് ഉദ്യോഗസ്ഥന്‍ വെടിവെച്ചത്.