സഹോദരിയുടെ ഫീസ് അടയ്ക്കാന്‍ കോളേജില്‍ പോയ യുവാവിനെ തൊപ്പി ധരിച്ചതിന് ചിലര്‍ സംഘം ചേര്‍ന്ന് മര്‍ദിച്ചു. സംഭവത്തിന്റെ വീഡിയോ സോഷ്യല്‍ മീഡിയയില്‍ വ്യാപകമായി പ്രചരിക്കുന്നുണ്ട്. ഉത്തര്‍ പ്രദേശ് മീററ്റിലെ ലിസാരി ഗേറ്റ് പ്രദേശത്തെ താമസക്കാരനായ മുഹമ്മദ് സാഹില്‍ ഫീസ് കൗണ്ടറിലെ ക്യൂവില്‍ നില്‍ക്കുമ്പോഴാണ് സംഭവം നടന്നതെന്ന് പൊലീസ് പറഞ്ഞു.
അക്രമികളിലൊരാള്‍ ഇടിക്കാന്‍ ഇഷ്ടിക എടുക്കുന്നതും തൊപ്പി അഴിച്ചുമാറ്റുന്നതും വീഡിയോയില്‍ കാണാം. കോളേജില്‍ പഠിക്കുന്ന സഹോദരിയും സാഹിലിനൊപ്പം ഉണ്ടായിരുന്നു. അക്രമികള്‍ വര്‍ഗീയ അധിക്ഷേപങ്ങള്‍ നടത്തിയതായും പരാതിയുണ്ട്. യുവാക്കള്‍ തൊപ്പി നീക്കം ചെയ്യാന്‍ ആവശ്യപ്പെടുകയും മര്‍ദിക്കുകയുമായിരുന്നു.
മുഹമ്മദ് സാഹിലിന്റെ സഹോദരി തടയാന്‍ ശ്രമിക്കുന്നതും സഹായത്തിനായി അപേക്ഷിക്കുന്നതും കാണാം. പ്രതികള്‍ക്കെതിരെ മുറിവേല്‍പ്പിക്കുക, സമാധാനം തകര്‍ക്കാനുള്ള ഉദ്ദേശ്യത്തോടെയുള്ള പ്രകോപനം, ക്രിമിനല്‍ ഭീഷണിപ്പെടുത്തല്‍ എന്നിവ പ്രകാരം കേസെടുത്തിട്ടുണ്ട്. പ്രതികളെ തിരിച്ചറിഞ്ഞിട്ടില്ലെന്നും അന്വേഷണം നടക്കുകയാണെന്നും എസ്.പി. പിയൂഷ് കുമാര്‍ പറഞ്ഞു.