മുംബൈയിലെ ബാന്ദ്ര റെയില്‍വേ സ്റ്റേഷനില്‍ മുസ്‌ലിം ആണ്‍കുട്ടിയെ ആള്‍ക്കൂട്ടം തല്ലിച്ചതച്ചു. പ്രായപൂര്‍ത്തിയാകാത്ത, കാണാതായ ഹിന്ദു പെണ്‍കുട്ടിക്കൊപ്പം കണ്ടതിനായിരുന്നു മര്‍ദ്ദനം. ജൂലൈ 21നാണു സംഭവം നടന്നത്. എന്നാല്‍ ഇതിന്റെ വീഡിയോ ചൊവ്വാഴ്ച സമൂഹമാധ്യമങ്ങളില്‍ പ്രചരിക്കുകയായിരുന്നു.
മുംബൈയ്ക്കടുത്തുള്ള അമ്പര്‍നാഥിലാണു പെണ്‍കുട്ടി താമസിച്ചിരുന്നത്. ഇവിടെനിന്നു കാണാതായ പെണ്‍കുട്ടിയെ ആരോ തട്ടിക്കൊണ്ടുപോയെന്നു മാതാപിതാക്കള്‍ പരാതി നല്‍കിയിരുന്നു. തുടര്‍ന്നു ബാന്ദ്ര റെയില്‍വേ സ്റ്റേഷനില്‍ പെണ്‍കുട്ടിയെ ആണ്‍കുട്ടിക്കൊപ്പം ചിലര്‍ കണ്ടെത്തുകയായിരുന്നു. ആണ്‍കുട്ടിയെ പിടികൂടി മര്‍ദ്ദിക്കുകയും വലിച്ചിഴയ്ക്കുകയും റെയില്‍വേ സ്റ്റേഷനു പുറത്തെത്തിച്ചു വീണ്ടും മര്‍ദ്ദിക്കുകയും ചെയ്തു.
തുടര്‍ന്നു പെണ്‍കുട്ടിയെ പൊലീസിന് കൈമാറി. ആണ്‍കുട്ടിയെ മര്‍ദ്ദിച്ചതിനും അധിക്ഷേപകരമായ മുദ്രാവാക്യങ്ങള്‍ വിളിച്ചതിനും തിരിച്ചറിയാത്ത ആളുകള്‍ക്കെതിരെ ബാന്ദ്ര റെയില്‍വേ പൊലീസ് കേസെടുത്തിട്ടുണ്ട്. സംഭവത്തില്‍ ഇതുവരെ ആരെയും അറസ്റ്റ് ചെയ്തിട്ടില്ല. ആക്രമിക്കപ്പെട്ട ആണ്‍കുട്ടിയെ തിരിച്ചറിയുകയും കുടുംബവുമായി ബന്ധപ്പെട്ടതായും പൊലീസ് അറിയിച്ചു.