കര്‍ണാടക മുഖ്യമന്ത്രി പദം വേണമെന്ന നിലപാടില്‍ ഉറച്ച് പിസിസി അധ്യക്ഷന്‍ ഡി.കെ ശിവകുമാര്‍. സിദ്ധരാമയ്യ ഡല്‍ഹിയില്‍ തുടരും. മുഖ്യമന്ത്രിപദത്തില്‍ വീതംവയ്പ് ഫോര്‍മുല അംഗീകരിക്കില്ലെന്ന നിലപാട് സ്വീകരിച്ച മല്ലികാര്‍ജുന്‍ ഖര്‍ഗെയുമായി ചര്‍ച്ചയ്ക്കുശേഷം മടങ്ങി. അതേസമയം, സത്യപ്രതിജ്ഞാ ഒരുക്കങ്ങള്‍ നിര്‍ത്തി. ശ്രീകണ്ഠീവരാ സ്റ്റേഡിയത്തില്‍ സത്യപ്രതിജ്ഞ വേദിയുടെ നിര്‍മാണം നേരത്തെ മുതല്‍ തുടങ്ങിയിരുന്നു. അനിശ്ചിത്വം തുടര്‍ന്നതോടെയാണ് ഇത് നിര്‍ത്തിയത്.
വീതംവയ്പ് ആണെങ്കില്‍ ആദ്യ ടേം തന്നെ ലഭിക്കണമെന്ന ആവശ്യവും ശിവകുമാര്‍ ഉന്നയിച്ചു. സോണിയ ഗാന്ധിയും ഓണ്‍ലൈനായി ചര്‍ച്ചയില്‍ പങ്കെടുത്തതയാണ് വിവരം. അടുത്തദിവസം തന്നെ തീരുമാനമെടുക്കുമെന്ന് രണ്‍ദീപ്‌സിങ് സുര്‍ജേവാല വ്യക്തമാക്കി. കോണ്‍ഗ്രസ് അധ്യക്ഷന്‍ തീരുമാനമെടുത്തിട്ടില്ലെന്നും ഊഹാപോഹങ്ങള്‍ പ്രചരിപ്പിക്കരുതെന്നും സുര്‍ജേവാല പറഞ്ഞു. സിദ്ധരാമയ്യ മുഖ്യമന്ത്രിയാകുമെന്ന വാര്‍ത്തകള്‍ വന്നതിന് പിന്നാലെയാണ് സുര്‍ജെവാല മാധ്യമങ്ങളെ കണ്ട് നിലപാട് വിശദീകരിച്ചത്.