നവകേരള സദസ്സ്: പഞ്ചായത്ത് സെക്രട്ടറിമാര്‍ പഞ്ചായത്ത് കൗണ്‍സിലിന്റെ പ്രമേയത്തിന് വിരുദ്ധമായി പണം നല്‍കുന്നതിന് ഹൈക്കോടതി സ്‌റ്റേ

പഞ്ചായത്ത് സെക്രട്ടറിമാർ പഞ്ചായത്ത് കൗൺസിലിൻ്റെ പ്രമേയത്തിന് വിരുദ്ധമായി നവകേരള സദസ്സിന് പണം നൽകുന്നത് ഹൈക്കോടതി തടഞ്ഞു.

മലപ്പുറം ജില്ലയിലെ പൂക്കോട്ടൂർ പഞ്ചായത്ത് പ്രസിഡൻ്റും ലോക്കൽ ഗവൺമെൻ്റ് മെസേഴ്സ് ലീഗ് (LGML) സംസ്ഥാന പ്രസിഡൻ്റുമായ കെ ഇസ്മായിൽ, കോഴിക്കോട് ജില്ലയിലെ പെരുവയൽ പഞ്ചായത്ത് വൈസ് പ്രസിഡൻ്റും LGML സംസ്ഥാന ജനറൽ സെക്രട്ടറിയുമായ പി കെ ഷറഫുദ്ദീൻ, മലപ്പുറം ബ്ലോക്ക് പഞ്ചായത്ത് പ്രസിഡൻ്റ് അബ്ദുറഹ്മാൻ കാരാട്ട് എന്നിവർ അഡ്വ മുഹമ്മദ് ഷാ മുഖാന്തിരം നൽകിയ റിട്ട് ഹർജിയിലാണ് ജസ്റ്റിസ് ബെച്ചു കുര്യൻ തോമസിൻ്റെ ഇടക്കാല ഉത്തരവ്.

കേസിലെ ഉൾപ്പെട്ടിരിക്കുന്ന പഞ്ചായത്തിൻ്റെ സെക്രട്ടറിമാർക്ക് പ്രത്യേക ദൂതൻ മുഖാന്തിരം നോട്ടീസ് നൽകാൻ ഉത്തരവിട്ട ഹൈക്കോടതി നവകേരള സദസ്സിനായി പണം നൽകുന്നതിൽ നിന്ന് മേൽ സെക്രട്ടറിമാരെ താൽക്കാലികമായി വിലക്കിയിട്ടുണ്ട്. കേസ് വിശദമായ വാദത്തിനായി 7.12.2023ലേക്ക് മാറ്റിവെച്ചു.