മലപ്പുറം: പൊലീസുമായി ഇടപെടല്‍ നടത്തുമ്പോള്‍ മോശം അനുഭവം ഉണ്ടാകാറുണ്ടോ? അതിനെതിരെ പരാതി എവിടെ നല്‍കുമെന്ന് അറിയാതെ സംഭവം വിട്ടുകളയാറാണോ പതിവ്. എന്നാല്‍ ഇനി അങ്ങനെ എവിടെ പരാതി നല്‍കുമെന്ന് അറിയാതെ ബുദ്ധിമുട്ടേണ്ട. പൊലിസിന്റെ പെരുമാറ്റത്തില്‍ നിങ്ങള്‍ക്ക് പരാതിയുണ്ടെങ്കില്‍ ഓണ്‍ലൈനായി പരാതി നല്‍കാം. ക്യുആര്‍ കോഡ് സ്‌കാന്‍ചെയ്താണ് ഇനി ഓണ്‍ലൈനായി പരാതി നല്‍കാന്‍ കഴിയുക. പദ്ധതി ഇന്ന് മലപ്പുറം ജില്ലയില്‍ നിലവില്‍ വരും. വൈകാതെ സംസ്ഥാനം മുഴുവന്‍ വ്യാപിപ്പിക്കും.
മലപ്പുറം ജില്ലയിയിലും തൃശ്ശൂര്‍ സിറ്റിയിലുമാണ് തുടക്കത്തില്‍ ഈ സേവനം ലഭ്യമാവുക. സംസ്ഥാന വ്യാപകമായി പദ്ധതി ഉടന്‍ നടപ്പിലാക്കും. സ്‌റ്റേഷനില്‍ പരാതിയുമായി എത്തുന്നവര്‍ക്ക് പൊലിസുകാരുടെ പെരുമാറ്റത്തില്‍ പരാതികളുണ്ടെങ്കില്‍ അവിടെത്തന്നെയുള്ള ക്യുആര്‍ കോഡ് സ്‌കാന്‍ ചെയ്ത് പരാതി നല്‍കാം. ഇങ്ങനെ നല്‍കുന്ന പരാതികള്‍ ജില്ലാ പൊലിസ് മേധാവിയുടെ ഓഫീസിലാണ് ലഭിക്കുക. അതിനാല്‍ വൈകാതെ പരാതിയില്‍ നടപടിയുണ്ടാകും.
പൊലിസില്‍ നല്‍കുന്ന പരാതി സ്വീകരിക്കാന്‍ പൊലിസ് തയാറാകുന്നില്ലെങ്കിലും ഓണ്‍ലൈനില്‍ പരാതി നല്‍കാം. സ്‌റ്റേഷനുകളില്‍ ക്യുആര്‍ കോഡ് പതിച്ചിട്ടുണ്ട്. പൊലിസിന്റെ പ്രവര്‍ത്തനം കൂടുതല്‍ മെച്ചപ്പെടുത്താന്‍ ഓണ്‍ലൈന്‍ സംവിധാനങ്ങള്‍ സഹായകമാകുമെന്ന് ജില്ലാ പൊലിസ് മേധാവി എസ്. ശശിധരന്‍ പറഞ്ഞു.