ക്രിക്കറ്റ് ലോകകപ്പില്‍ ലഭിച്ച ഗംഭീര തുടക്കത്തിന്റെ ആവേശത്തിലാണ് ടീം ഇന്ത്യ. ആദ്യ മത്സരത്തില്‍ കരുത്തരായ കങ്കാരുക്കളെയും രണ്ടാം മത്സരത്തില്‍ അഫ്ഗാനെയും തകര്‍ത്ത ഇന്ത്യ ശനിയാഴ്ച ചിരവൈരികളായ പാകിസ്താനെ നേരിടാനൊരുങ്ങുകയാണ്. ലോകകപ്പ് ടീമില്‍ ഇന്ത്യയുടെ ഏറ്റവും പ്രധാന താരങ്ങളില്‍ ഒരാളാണ് ഓപ്പണര്‍ ശുഭ്മാന്‍ ഗില്‍.
കുറഞ്ഞ കാലയളവുകൊണ്ടു തന്നെ ഇന്ത്യയുടെ വിശ്വസ്ത ഓപണറായി മാറിയ ശുഭ്മാന്‍ ഗില്‍ ഈ വര്‍ഷം കത്തുന്ന ഫോമിലാണുള്ളത്. 7 സെഞ്ച്വറി ഉള്‍പ്പെടെ 1,230 റണ്‍സാണ് ഈ വര്‍ഷം മാത്രം താരം അടിച്ചുകൂട്ടിയത്. എന്നാല്‍ ലോകകപ്പിലെ ആദ്യ മത്സരത്തിന് തൊട്ടുമുമ്പ് താരത്തിന് ഡെങ്കിപ്പനി ബാധിച്ചു.
ഇതോടെ ആദ്യ 2 മത്സരങ്ങളിലും താരം ടീമില്‍ നിന്ന് പുറത്തായി. രോഹിത് ശര്‍മക്കൊപ്പം ഇഷാന്‍ കിഷനാണ് ഗില്ലിന് പകരം ഓസീസിനെതിരെയും അഫ്ഗാനിസ്ഥാനെതിരെയും ഓപ്പണറുടെ റോളിലെത്തിയത്.
ഇപ്പോഴിതാ ഇന്ത്യന്‍ ക്യാമ്പില്‍ നിന്ന് ആരാധകര്‍ക്കൊരു സന്തോഷ വാര്‍ത്ത എത്തിയിരിക്കുന്നു. പനി മാറി തിരിച്ചെത്തിയ ശുഭ്മാന്‍ ഗില്‍ ടീമിനൊപ്പം പരിശീലനം ആരംഭിച്ചു. മൊട്ടേരയിലെ നരേന്ദ്ര മോദി സ്‌റ്റേഡിയത്തില്‍ ശനിയാഴ്ച അരങ്ങേറുന്ന ഇന്ത്യപാക് പോരാട്ടത്തില്‍ താരം കളിക്കാനിറങ്ങുമെന്നാണ് സൂചന.