![](data:image/svg+xml;charset=utf-8,<svg height="555px" width="740px" xmlns="http://www.w3.org/2000/svg" version="1.1"/>)
സി.പി.എം സംസ്ഥാന സമ്മേളനം കൊല്ലത്ത് നടക്കുമ്പോള്‍ സ്ഥലത്തെ പാര്‍ട്ടി എംഎല്‍എ മുകേഷ് എവിടെയെന്ന ചോദ്യം ഉയരുന്നു. ലൈംഗിക ആരോപണ കേസില്‍ പൊലീസ് കുറ്റപത്രം നല്‍കിയതോടെ സമ്മേളന പരിപാടികളില്‍ നിന്ന് മുകേഷിനെ മാറ്റിനിര്‍ത്തിയെന്നാണ് സൂചന. പാര്‍ട്ടി കേന്ദ്ര നേതൃത്വത്തിന്റെ നിര്‍ദ്ദേശപ്രകാരമാണ് ഇതെന്നാണ് വിവരം.
മുപ്പത് വര്‍ഷത്തിന് ശേഷം കൊല്ലം നഗരം സി.പി.എം സംസ്ഥാന സമ്മേളനത്തിന് ആതിഥേയത്വം അരുളുമ്പോള്‍ പാര്‍ട്ടി എംഎല്‍എ എം. മുകേഷ് എറണാകുളത്താണ്. സമ്മേളനത്തിന്റെ ഭാഗമായ പരിപാടികളില്‍ എം മുകേഷിനെ പങ്കെടുപ്പിക്കേണ്ടതില്ലെന്ന് സി.പി.എം വനിത പോളിറ്റ് ബ്യൂറോ അംഗം തന്നെ സംസ്ഥാന നേതൃത്വത്തോട് നിര്‍ദ്ദേശിച്ചിരുന്നു.
സമ്മേളനത്തിന്റെ ഭാഗമായിയുള്ള പ്രചരണ പരിപാടികളിലും മുകേഷിനെ പങ്കെടുപ്പിച്ചില്ല. എന്നാല്‍ വ്യക്തിപരമായ കാരണത്താലാണ് സമ്മേളനത്തില്‍ പങ്കെടുത്തതെന്നാണ് മുകേഷിനോട് അടുത്ത കേന്ദ്രങ്ങള്‍ നല്‍കുന്ന വിവരം. ലൈംഗിക ആരോപണം ഉയര്‍ന്ന ഘട്ടത്തില്‍ എം മുകേഷ് എംഎല്‍എ സ്ഥാനം രാജി വെക്കേണ്ടതില്ലെന്ന് സിപിഎം തീരുമാനം എടുത്തിരുന്നു. പക്ഷേ പിന്നീട് പാര്‍ട്ടി പരിപാടികളില്‍ നിന്ന് തീര്‍ത്തും മുകേഷിനെ സിപിഎം മാറ്റി നിര്‍ത്തിയിരിക്കുകയാണ്.
