ഹിമാചല്‍ പ്രദേശിലെ കുളു ജില്ലയില്‍ മേഘവിസ്‌ഫോടനം. കിയാസ്, നിയോലി ഗ്രാമങ്ങളിലാണ് മേഘവിസ്‌ഫോടനം ഉണ്ടായത്. സംഭവത്തില്‍ ഒരാള്‍ മരിക്കുകയും 3 പേര്‍ക്ക് പരിക്കേല്‍ക്കുകയും ചെയ്തതായി പൊലീസ് അറിയിച്ചു. നിരവധി വാഹനങ്ങള്‍ ഒലിച്ചുപോയി.
‘കിയാസ്, നിയോലി ഗ്രാമങ്ങളിലുണ്ടായ മേഘസ്ഫോടനത്തെ തുടര്‍ന്ന് ഒരു മരണം റിപ്പോര്‍ട്ട് ചെയ്തിട്ടുണ്ട്. 3 പേര്‍ക്കാണ് പരിക്കേറ്റത്. 9 വാഹനങ്ങള്‍ക്ക് കേടുപാടുകള്‍ സംഭവിച്ചിട്ടുണ്ട്. വിവരം ലഭിച്ചയുടന്‍ പൊലീസ് സ്ഥലത്തെത്തി രക്ഷാപ്രവര്‍ത്തനം ആരംഭിച്ചു’- ഡെപ്യൂട്ടി പൊലീസ് സൂപ്രണ്ട് രാജേഷ് താക്കൂര്‍ പറഞ്ഞു.
കനത്ത മഴയെ തുടര്‍ന്ന് ഹിമാചല്‍ പ്രദേശിലെ 4 ജില്ലകളില്‍ കാലാവസ്ഥാ നിരീക്ഷണ കേന്ദ്രം ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. മഴ കെടുതിയില്‍ സംസ്ഥാനത്തിന് ഏകദേശം 8,000 കോടി രൂപയുടെ നഷ്ടമുണ്ടായതായി മുഖ്യമന്ത്രി സുഖ്വീന്ദര്‍ സിംഗ് സുഖു കഴിഞ്ഞ ദിവസം പറഞ്ഞിരുന്നു. ഹിമാചല്‍ പ്രദേശിലെ മഴ കെടുതിയില്‍ ഇതുവരെ 100-ലധികം ആളുകള്‍ക്കാണ് ജീവന്‍ നഷ്ടമായത്.
സംസ്ഥാനത്ത് 667 വീടുകള്‍ പൂര്‍ണമായും 1,264 പേര്‍ക്ക് ഭാഗികമായും കേടുപാടുകള്‍ സംഭവിച്ചതായി സംസ്ഥാന എമര്‍ജന്‍സി റെസ്പോണ്‍സ് സെന്റര്‍ അറിയിച്ചു. ജൂലൈയില്‍ ഇതുവരെ 284.1 മില്ലിമീറ്റര്‍ മഴയാണ് സംസ്ഥാനത്ത് പെയ്തത്, സാധാരണ 110.4 മില്ലിമീറ്റര്‍ മഴ ലഭിക്കേണ്ടിടത്ത് 157 ശതമാനം അധികമാണിത്.