അബുദാബി: തലസ്ഥാന നഗരിയില്‍നിന്നുള്ള യാത്രക്കാര്‍ക്ക് 24 മണിക്കൂര്‍ മുമ്പ് മുതല്‍ ചെക്ക് ഇന്‍ സൗകര്യം ഒരുക്കി എയര്‍ അറേബ്യ. മീന തുറമുഖത്തെ ക്രൂയിസ് ടെര്മിനല്‍, അബുദാബി എക്സിബിഷന്‍ സെന്റര്‍ എന്നിവിടങ്ങളിലാണ് എയര്‍ അറേബ്യ സേവനം ഏര്‍പ്പെടുത്തിയിട്ടുള്ളത്. വിമാന സമയത്തിന് 4 മണിക്കൂര്‍ മുതല്‍ 24 മണിക്കൂര്‍ മുമ്പ് വരെ ഈ കേന്ദ്രങ്ങളില്‍ ബാഗേജ് സ്വീകരിച്ച് ബോര്‍ഡിങ് കാര്‍ഡ് നല്‍കുന്നതാണ്. മുറാഫിക് ഏവിയേഷന്‍ സര്‍വീസിന്റെ കീഴില്‍ അബുദാബി മീന തുറമുഖത്തെ ക്രൂയിസ് ടെര്‍മിനലില്‍ രാവിലെ 8 മണി മുതല്‍ രാത്രി 12 വരെ മുന്‍കൂര്‍ ചെക്ക് ഇന്‍ സൗകര്യം ഒരുക്കിയിട്ടുണ്ട്.
അബുദാബി എക്സിബിഷന്‍ സെന്ററില്‍ രാവിലെ 9 മുതല്‍ രാത്രി 9 മണി വരെയാണ് സേവനം ലഭിക്കുക. മുസ്സഫ -അബുദാബി ഹൈവേയില്‍നിന്നും നേരിട്ട് പ്രവേശിക്കാവുന്ന വിധത്തിലാണ് എക്സിബിഷന്‍ സെന്ററിലെ കേന്ദ്രം സ്ഥാപിച്ചിരിക്കുന്നത്.
ഈ രണ്ടിടങ്ങളില്‍ ബാഗേജുകള്‍ നല്‍കി ബോര്‍ഡിങ് പാസ് എടുക്കുന്ന യാത്രക്കാര്‍ വിമാനത്താവളത്തില്‍ നേരത്തെ എത്തി നീണ്ട ക്യൂ വില്‍ കാത്തു നില്‍ക്കേണ്ടതില്ല. ഇവര്‍ക്ക് നേരിട്ട് എമിഗ്രേഷന്‍ വിഭാഗത്തില്‍ പ്രവേശിച്ചു നടപടികള്‍ പൂര്‍ത്തീകരിക്കാന്‍ സാധിക്കും. മൂന്നുമണിക്കൂര്‍ നേരത്തെ എയര്‍പോര്‍ട്ടില്‍ എത്തണമെന്ന സാധാരണ നിബന്ധനയും ഇവര്‍ക്ക് ബാധകമായിരിക്കില്ല. കുടുംബത്തോടൊപ്പം യാത്ര ചെയ്യുന്നവര്‍ക്ക് ഈ സൗകര്യം കൂടുതല്‍ സൗകര്യപ്രദമായിരിക്കും.
മുതിര്‍ന്നവര്‍ക്ക് 35 ദിര്‍ഹവും, കുട്ടികള്‍ക്ക് 25 ദിര്‍ഹവുമാണ് ചെക്ക് ഇന്‍ സേവനത്തിനുള്ള നിരക്കായി ഈടാക്കുന്നത്. വിശാലമായ സൗജന്യ പാര്‍ക്കിങ് സൗകര്യം ഇരു കേന്ദ്രങ്ങളിലും ലഭ്യമാണ്. കൂടുതല്‍ വിവരങ്ങള്‍ക്ക് 800 667 2347 എന്ന ടോള്‍ഫ്രീ നമ്പറില്‍ ബന്ധപ്പെടാവുന്നതാണ്.