2024ലെ ലോക്‌സഭാ തിരഞ്ഞെടുപ്പില്‍ പ്രതിപക്ഷ ഇന്ത്യ മുന്നണി അധികാരത്തില്‍ വന്നാല്‍ കോണ്‍ഗ്രസ് ദേശീയ അധ്യക്ഷന്‍ മല്ലികാര്‍ജുന്‍ ഖര്‍ഗെയെയോ മുന്‍ അധ്യക്ഷനും എംപിയുമായ രാഹുല്‍ ഗാന്ധിയെയോ പ്രധാനമന്ത്രി സ്ഥാനത്തേക്ക് കോണ്‍ഗ്രസ് നാമനിര്‍ദേശം ചെയ്‌തേക്കാമെന്ന് കോണ്‍ഗ്രസ് പ്രവര്‍ത്തക സമിതി അംഗവും എംപിയുമായ ശശി തരൂര്‍.
2024ലെ ലോക്‌സഭാ തിരഞ്ഞെടുപ്പില്‍ പ്രതിപക്ഷ സഖ്യം ഉള്ളതിനാല്‍ അപ്രതീക്ഷിത ഫലമുണ്ടാകുമെന്നും തിരഞ്ഞെടുപ്പില്‍ ബിജെപി നേതൃത്വത്തിലുള്ള എന്‍ഡിഎയെ തോല്‍പ്പിച്ച് ഇന്ത്യ മുന്നണി അധികാരത്തിലെത്താനുള്ള സാധ്യതയുണ്ടെന്നും ശശി തരൂര്‍ പറഞ്ഞു. ”അതിനാല്‍ കാത്തിരുന്ന് കാണേണ്ടതുണ്ട്” എന്നും അദ്ദേഹം പറഞ്ഞു.
”തിരഞ്ഞെടുപ്പ് ഫലം വന്നാല്‍, ഒരു സഖ്യമായതിനാല്‍, ആ പാര്‍ട്ടികളുടെ നേതാക്കള്‍ ഒത്തുചേര്‍ന്ന് ആരെയെങ്കിലും പ്രധാനമന്ത്രി സ്ഥാനത്തേക്കു തിരഞ്ഞെടുക്കേണ്ടിവരും. പക്ഷേ എന്റെ അനുമാനം കോണ്‍ഗ്രസില്‍നിന്ന് ഖര്‍ഗെയോ രാഹുല്‍ ഗാന്ധിയോ വന്നേക്കും. ഖര്‍ഗെയാണെങ്കില്‍ ഇന്ത്യയുടെ ആദ്യ ദലിത് പ്രധാനമന്ത്രിയാകും. അല്ലെങ്കില്‍ രാഹുല്‍ ഗാന്ധിയാകും. കാരണം പല വിധത്തിലും കോണ്‍ഗ്രസ് ‘ഒരു കുടുംബം പാര്‍ട്ടി’യാണ്” അദ്ദേഹം കൂട്ടിച്ചേര്‍ത്തു.