ഐസ്‌ക്രീം കഴിച്ച് ഛര്‍ദ്ദി ഉണ്ടായതിനെ തുടര്‍ന്ന് വിദ്യാര്‍ത്ഥി മരിച്ച സംഭവത്തില്‍ കുട്ടിയുടെ ബന്ധു കസ്റ്റഡിയില്‍. പിതൃസഹോദരിയാണ് കസ്റ്റഡിയിലുള്ളത്. സംഭവം കൊലപാതകമെന്ന് പൊലീസ് നേരത്തെ സംശയം പറഞ്ഞിരുന്നു. സൈബര്‍ സെല്‍ മൊബൈല്‍ ഫോണ്‍ പരിശോധിച്ചാണ് സഹോദരിയെ കസ്റ്റഡിയില്‍ എടുത്തിരിക്കുന്നത്.
അരിക്കുളം കോറോത്ത് മുഹമ്മദാലിയുടെ മകന്‍ അഹമ്മദ് ഹാസന്‍ റിഫായി (12)യാണ് ഐസ് കഴിച്ച് ഛര്‍ദിയെ തുടര്‍ന്ന് മരിച്ചത്. ഞായറാഴ്ച അരിക്കുളത്തെ കടയില്‍ നിന്നാണ് ഐസ്‌ക്രീം കഴിച്ചത്. ചര്‍ദ്ദി രൂക്ഷമായതോടെ ആശുപത്രിയില്‍ പ്രവേശിപ്പിച്ചു. ആശുപത്രിയില്‍ വെച്ച് മരണപ്പെടുകയും ചെയ്തു.
ആരോഗ്യവകുപ്പ്, ഭക്ഷ്യവകുപ്പും പരിശോധന നടത്തി കട അടപ്പിച്ചു. കുട്ടിയുടെ ശരീരത്തില്‍ അമോണിയം ഫോസ്ഫറസിന്റെ സാന്നിധ്യം കണ്ടെത്തിയതാണ് കൊലപാതകമാണെന്ന സംശയം ഉണ്ടായത്. കേസില്‍ അന്വേഷണം പുരോഗമിക്കുന്നു.