കാസര്‍കോട് പെരിയാട്ടടുക്കത്ത് മുഖ്യമന്ത്രിയെത്തുന്ന പാര്‍ട്ടി പരിപാടിക്ക് വേദിയൊരുക്കാന്‍ വഴിയരികിലെ മരങ്ങള്‍ സി.പി.എം പ്രവര്‍ത്തകര്‍ മുറിച്ചെന്ന് നാട്ടുകാര്‍. അനുമതിയില്ലാതെ പൊതുമരാമാത്ത് വകുപ്പിന്റെ ഉടമസ്ഥതയിലുള്ള 5 തണല്‍ മരങ്ങളാണ് മുറിച്ചു മാറ്റിയത്.
സി.പി.എം പനയാല്‍ ലോക്കല്‍ കമ്മറ്റി ഓഫീസ് ഉദ്ഘാടനത്തിനായി മുഖ്യമന്ത്രി പിണറായി വിജയന്‍ പെരിയാട്ടടുക്കത്തെത്തുന്നത് ഈ മാസം ഇരുപത്തിമൂന്നിനാണ്. മുഖ്യമന്ത്രിക്ക് വേദിയൊരുക്കാന്‍ ടൗണില്‍ സ്ഥലമില്ലാതെ വന്നത്തോടെയാണ് വഴിയരികിലെ തണല്‍ മരങ്ങള്‍ മുറിച്ചത്. വനം വകുപ്പിന്റെയോ പഞ്ചായത്തിന്റെയോ അനുമതിയില്ലാതെയാണ് മരങ്ങള്‍ മുറിച്ചതെന്നാണ് നാട്ടുകാര്‍ പറയുന്നത്.
എന്നാല്‍ വഴിയരികില്‍ വൈദ്യുതി ലൈനിനോട് ചേര്‍ന്ന് അപകടവസ്ഥയില്‍ വളര്‍ന്നതോടെയാണ് മരങ്ങള്‍ മുറിച്ചതെന്നാണ് സി.പി.എമ്മിന്റെ വിശദീകരണം. സംഭവത്തില്‍ ഇതുവരെ നടപടിയെടുക്കാന്‍ പൊതുമരാമത്ത് വകുപ്പോ, പഞ്ചായത്തോ തയാറായിട്ടില്ല.