ബന്ധുവായ പെണ്‍കുട്ടിയെ പ്രണയിച്ചതിന്റെ പേരില്‍ 18 കാരനെ ബന്ധുക്കള്‍ ചേര്‍ന്ന് തട്ടിക്കൊണ്ടുപോയി തീകൊളുത്തി. ബെംഗളുരുവില്‍ കഴിഞ്ഞ ശനിയാഴ്ച്ചയായിരുന്നു സംഭവം. ബെംഗളുരുവിലെ എസിഎസ് കോളേജിലെ ഒന്നാം വര്‍ഷ കമ്പ്യൂട്ടര്‍ സയന്‍സ് വിദ്യാര്‍ഥിയായ ശശാങ്ക് ആണ് ആക്രമണത്തിന് ഇരയായത്. വിക്ടോറിയ ആശുപത്രിയില്‍ അതീവ ഗുരുതരാവസ്ഥയില്‍ കഴിയുകയാണ് വിദ്യാര്‍ത്ഥി.
സംഭവത്തില്‍ ശശാങ്കിന്റെ പിതാവ് രംഗനാഥ് പൊലീസില്‍ പരാതി നല്‍കി. മൈസൂരിലുള്ള അകന്ന ബന്ധത്തില്‍ പെട്ട പെണ്‍കുട്ടിയുമായി മകന്‍ പ്രണയത്തിലായിരുന്നുവെന്നും ഇതില്‍ ബന്ധുക്കള്‍ക്കുള്ള വിയോജിപ്പാണ് ആക്രമണത്തിന് കാരണമെന്നുമാണ് രംഗനാഥ് ആരോപിക്കുന്നത്.
തട്ടിക്കൊണ്ടുപോയ ദിവസം രംഗനാഥാണ് മകനെ കോളേജില്‍ വിട്ടത്. എന്നാല്‍, ക്ലാസ് ഇല്ലാത്തതിനാല്‍ ശശാങ്ക് കോളേജില്‍ നിന്നും വീട്ടിലേക്ക് മടങ്ങുന്നതിനിടയിലാണ് തട്ടിക്കൊണ്ടുപോയത്. ബസ് സ്റ്റോപ്പിലേക്ക് നടന്ന ശശാങ്കിനെ കാറിലെത്തിയ ഏഴംഗ സംഘം തട്ടിക്കൊണ്ടുപോകുകയായിരുന്നു. ശേഷം നഗരത്തില്‍ നിന്നും മാറി കനിമിനിക് ടോള്‍ പ്ലാസയ്ക്ക് സമീപം ആളൊഴിഞ്ഞ സ്ഥലത്ത് എത്തിച്ച് തീകൊളുത്തുകയായിരുന്നു.
ശശാങ്കിനെ ആക്രമിച്ചവരെല്ലാം ഇരു കുടുംബത്തിന്റേയും ബന്ധുക്കള്‍ തന്നെയാണെന്നാണ് സൂചന. ഇവരില്‍ ഒരാള്‍ പെണ്‍കുട്ടിയുടേയും ശശാങ്കിന്റേയും അമ്മാവനാണ്. ”മകനെ തീകൊളുത്തിയതിനു ശേഷം സ്ഥലത്തിന്റെ ലൊക്കേഷന്‍ രംഗനാഥിന്റെ സഹോദരിയുടെ വാട്‌സ്ആപ്പിലേക്ക് അയക്കുകയും എത്രയും വേഗം എത്തിയാല്‍ ശശാങ്കിനെ രക്ഷിക്കാമെന്ന് മുന്നറിയിപ്പ് നല്‍കി”.
പെണ്‍കുട്ടിയുമായി മകന്‍ ഒരു വര്‍ഷത്തിലായി പ്രണയത്തിലായിരുന്നുവെന്ന് രംഗനാഥ് പറയുന്നു. പ്രശ്‌നം രമ്യമായി പരിഹരിക്കാമെന്ന് ബന്ധുക്കളോട് താന്‍ പറഞ്ഞിരുന്നെങ്കിലും ശശാങ്കിനെ പെട്രോള്‍ ഒഴിച്ച് കത്തിക്കുമെന്ന് അമ്മാവന്‍ ഭീഷണിപ്പെടുത്തിയിരുന്നതായി രംഗനാഥ് പൊലീസിനോട് പറഞ്ഞു.
സംഭവത്തില്‍ കര്‍ണാടക ആഭ്യന്തര മന്ത്രി ജി പരമേശ്വര്‍ പൊലീസിനോട് റിപ്പോര്‍ട്ട് ആവശ്യപ്പെട്ടു. കുറ്റക്കാരെ എത്രയും വേഗം പിടികൂടുമെന്നും തക്കതായ ശിക്ഷ നല്‍കുമെന്നും മന്ത്രി ഉറപ്പ് നല്‍കി.