കണ്ണൂര്‍ സെന്‍ട്രല്‍ ജയിലില്‍ നിന്നു പ്രതികളുമായി വന്ന പൊലീസ് ബസ് അപകടത്തില്‍പ്പെട്ടു. കൊയിലാണ്ടിയില്‍ വച്ച് പൊലീസ് ബസും ഇന്നോവ കാറുമാണ് കൂട്ടിയിടിച്ചത്. അപകടത്തില്‍ മൂന്ന് പൊലീസുകാരുള്‍പ്പെടെ 10 പേര്‍ക്ക് പരിക്കേറ്റു. പരിക്കേറ്റ ഏഴുപേരെ കൊയിലാണ്ടി താലൂക്ക് ആശുപത്രിയില്‍ പ്രവേശിപ്പിച്ചു. ഒരാളെ കോഴിക്കോട് മെഡിക്കല്‍ കോളേജ് ആശുപത്രിയിലേക്ക് മാറ്റി.
ഇന്ന് വൈകീട്ട് 3.30 ന് കൊയിലാണ്ടി ദേശീയപാതയില്‍ കൃഷ്ണ തിയറ്ററിനു സമീപത്താണ് അപകടമുണ്ടായത്. മലപ്പുറം എആര്‍ ക്യാമ്പില്‍ നിന്നു പ്രതകളുമായി കണ്ണൂര്‍ സെന്‍ട്രല്‍ ജയിലില്‍ പോയി തിരിച്ചു വരുമ്പോഴാണ് പൊലീസ് ബസ് അപകടത്തില്‍പ്പെട്ടത്.
ഇടിയുടെ ആഘാതത്തില്‍ ഇന്നോവ കാറിലെ ഡ്രൈവര്‍ വണ്ടിയില്‍ കുടുങ്ങിക്കിടന്നു. പിന്നീട് അഗ്നിരക്ഷാ സേനയും നാട്ടുകാരും ചേര്‍ന്നാണ് ഇയാളെ കാറില്‍ നിന്നും പുറത്തെടുത്തത്.