കൊച്ചി: കേരള ബ്ലാസ്റ്റേഴ്സിന്റെ യുവ ഗോള്‍കീപ്പര്‍ പ്രഭ്‌സുഖാന്‍ സിങ് ഗിലും ടീം വിട്ടു. ഒന്നരകോടി രൂപയുടെ കരാറില്‍ താരം ഈസ്റ്റ് ബംഗാളുമായി ഒപ്പുവച്ചതായാണ് റിപ്പോര്‍ട്ട്. ഐഎസ്എലില്‍ ഒരു ഗോള്‍കീപ്പര്‍ക്ക് ലഭിക്കുന്ന ഏറ്റവും വലിയ പ്രതിഫലമാണിത്. രണ്ടു വര്‍ഷത്തേക്കാണ് കരാര്‍ എന്നാണ് സൂചന. അവസാന രണ്ടു സീസണുകളിലും കേരള ബ്ലാസ്റ്റേഴ്സിന്റെ പ്രധാന ഗോള്‍കീപ്പര്‍ ആയിരുന്ന ഗില്‍ മികച്ച പ്രകടനമാണ് നടത്തിയത്.
രണ്ട് സീസണുകളിലായി 38 മത്സരങ്ങളില്‍ ബ്ലാസ്റ്റേഴ്സിന്റെ വലകാത്തു. 2020ല്‍ ബെംഗളൂരു എഫ്‌സിയില്‍ നിന്നാണ് ഗില്‍ ബ്ലാസ്‌റ്റേഴ്‌സിലെത്തിയത്. അതേസമയം, മലയാളി പരിശീലകനായ ടി.ജി പുരുഷോത്തമനെ കേരള ബ്ലാസ്റ്റേഴ്സ് സീനിയര്‍ ടീമിന്റെ പുതിയ അസിസ്റ്റന്റ് കോച്ചായി നിയമിച്ചു. മൂന്ന് വര്‍ഷത്തേക്കാണ് കരാര്‍. കേരള ബ്ലാസ്റ്റേഴ്സ് റിസര്‍വ് ടീമിന്റെ പരിശീലകനായിരുന്നു. കേരള സന്തോഷ് ട്രോഫി ടീമിന്റെ സഹ പരിശീലകനായും പ്രവര്‍ത്തിച്ചിട്ടുണ്ട്.