മുഹമ്മദ് ആദില്‍.ടി
വിജയ് നായകനായ തമിഴ് സിനിമ ബീസ്റ്റിന്റെ പ്രദര്‍ശനം നിരോധിക്കണമെന്ന് ആവശ്യപ്പെട്ട് മുസ്‌ലിംലീഗ് ഹോം സെക്രട്ടറിക്ക് കത്ത് നല്‍കിയെന്ന വാര്‍ത്ത വ്യാജം. തമിഴ് മാനില മുസ്‌ലിംലീഗിന്റെ (ടി.എന്‍.എം.എം.എല്‍) പേരിലുള്ള കത്താണ് ഇന്ത്യന്‍ യൂണിയന്‍ മുസ്‌ലിംലീഗിന്റേതെന്ന രീതിയില്‍ മലയാളം പത്രങ്ങള്‍ ഉള്‍പ്പെടെ വാര്‍ത്തയാക്കിയത്.
ഇന്ത്യന്‍ യൂണിയന്‍ മുസ്‌ലിംലീഗുമായി ഒരു ബന്ധവുമില്ലാത്ത സംഘടനയാണ് തമിഴ് മാനില കക്ഷി. കുവൈത്തില്‍ വിലക്കിയതിന് പിന്നാലെ വിജയ് ചിത്രം ബീസ്റ്റ് ഇന്ത്യയിലും നിരോധിക്കണമെന്നാവശ്യപ്പെട്ട് തമിഴ് മാനില നേതാവ് വി.എം.എസ് മുസ്തഫയാണ് ഹോം സെക്രട്ടറിക്ക് കത്തയച്ചത്. ടി.എന്‍.എം.എം.എല്‍ സ്ഥാപക നേതാവാണ് വി.എം.എസ് മുസ്തഫ. കുവൈത്തില്‍ നേരത്തെ സിനിമ പ്രദര്‍ശനം വിലക്കിയിരുന്നു.
അടുത്തിടെ പുറത്ത് വിട്ട സിനിമയുടെ ട്രെയിലറില്‍ മുസ്‌ലിം തീവ്രവാദത്തിന്റെ പശ്ചാത്തലം കാണിക്കുന്നുണ്ട്. ഇതെ തുടര്‍ന്നാണ് വിജയ് ചിത്രത്തിന് കുവൈത്ത് സര്‍ക്കാര്‍ വിലക്കേര്‍പ്പെടുത്താന്‍ തീരുമാനിച്ചത്.