റോഡിലെ കുഴിയില്‍ വീണ് പരിക്കേറ്റ് ചികിത്സയിലായിരുന്ന 74 കാരന്‍ മരിച്ചു. ആലുവ-പെരുമ്പാവൂര്‍ റോഡിലെ കുഴിയില്‍ വീണ് ചികിത്സയിലായിരുന്ന മാറമ്പിള്ളി കുന്നത്തുകര സ്വദേശി കുഞ്ഞിമുഹമ്മദ് (74) ആണ് ഇന്ന് വൈകിട്ടോടെ മരിച്ചത്.
ഓഗസ്റ്റ് 20ാം തീയതിയാണ് ചാലക്കല്‍ പതിയാട്ട് കവലയ്ക്ക് സമീപം സ്‌കൂട്ടറില്‍ സഞ്ചരിക്കവെ കുഞ്ഞിമുഹമ്മദ് കുഴിയില്‍ വീണ് ഗുരുതരമായി പരിക്കേറ്റത്. മൂന്നാഴ്ചയായി അബോധാവസ്ഥയിലായിരുന്നു.
ആലുവ -പെരുമ്പാവൂര്‍ റോഡിന്റെ ശോചനീയാവസ്ഥയെക്കുറിച്ച് നേരത്തെയും പലകുറി പരാതി ഉയര്‍ന്നതാണ്. ഇവിടത്തെ അപകടവും ഇപ്പോള്‍ ഒരു നിത്യസംഭവമായിരിക്കുന്നു.
ഈ റോഡുമായി ബന്ധപ്പെട്ടാണ് നേരത്തെ ഹൈക്കോടതി ജില്ലാ കളക്ടറോട് റിപ്പോര്‍ട്ട് തേടിയത്. അതിനിടെ കുഞ്ഞു മുഹമ്മദിന്റെ മരണത്തില്‍ ബന്ധപ്പെട്ട അധികൃതര്‍ക്കെതിരെ കൊലക്കുറ്റം ചുമത്തി കേസെടുക്കണമെന്ന് ആലുവ എംഎല്‍എ അന്‍വര്‍ സാദത്ത് ആവശ്യപ്പെട്ടു.