ചങ്ങരംകുളം: കഞ്ചാവുമായി പോകുമ്പോള്‍ ബൈക്ക് മറിഞ്ഞ് ഗുരുതരമായി പരിക്കേറ്റ് ചികിത്സയില്‍ കഴിഞ്ഞ പൊന്നാനി സ്വദേശിയെ ചങ്ങരംകുളം പൊലീസ് അറസ്റ്റ് ചെയ്തു.പൊന്നാനി കല്ലൂക്കാരന്റെ ഹൗസില്‍ ശിഹാബിനെ (34) ആണ് ചങ്ങരംകുളം സി.ഐ ബഷീര്‍ ചിറക്കല്‍ അറസ്റ്റ് ചെയ്തത്. ഡിസംബര്‍ ഒമ്പതിന് പുലര്‍ച്ച എടപ്പാള്‍ -പൊന്നാനി റോഡിലാണ് ശിഹാബ് ഓടിച്ച സ്‌കൂട്ടര്‍ അപകടത്തില്‍പെട്ടത്. നൈറ്റ് പട്രോളിങ്ങിനിറങ്ങിയ പൊലീസിനെ കണ്ട് അമിത വേഗത്തില്‍ ഓടിച്ചുപോയ സ്‌കൂട്ടര്‍ നിയന്ത്രണംവിട്ട് മറിയുകയായിരുന്നു.
ഗുരുതര പരിക്കേറ്റ ശിഹാബിനെ നാട്ടുകാര്‍ എടപ്പാളിലെ സ്വകാര്യ ആശുപത്രിയിലും പിന്നീട് തൃശൂര്‍ മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു. അപകടം നടന്ന സ്ഥലത്ത് പൊലീസ് നടത്തിയ പരിശോധനയിലാണ് സ്‌കൂട്ടറില്‍നിന്ന് 1.25 കിലോ കഞ്ചാവ് കണ്ടെടുത്തത്. തുടര്‍ന്ന് പൊലീസ് നിരീക്ഷണത്തില്‍ ചികിത്സയില്‍ കഴിഞ്ഞ ശിഹാബ് ആശുപത്രി വിട്ടതോടെ ചങ്ങരംകുളം പൊലീസ് കസ്റ്റഡിയില്‍ എടുത്ത് അറസ്റ്റ് രേഖപ്പെടുത്തുകയായിരുന്നു.പ്രതിയെ പൊന്നാനി ജുഡീഷ്യല്‍ മജിസ്‌ട്രേറ്റ് കോടതിയില്‍ ഹാജറാക്കി റിമാന്‍ഡ് ചെയ്തു.