ന്യൂ ഡല്‍ഹി: എം.ബി.ബി.എസ്, ബി.ഡി.എസ് വിദ്യാര്‍ഥികള്‍ക്ക് ഇന്റേണ്‍ഷിപ് പൂര്‍ത്തിയാക്കാനുള്ള സമയപരിധി നീട്ടിനല്‍കിയതിനെ തുടര്‍ന്ന് നീറ്റ് പി.ജി, നീറ്റ് എം.ഡി.എസ് പരീക്ഷകള്‍ക്കുള്ള അപേക്ഷാ തീയതിയും നീട്ടി. നീറ്റ് പി.ജിക്ക് ഫെബ്രുവരി 12 വരെയാണ് അപേക്ഷിക്കാന്‍ സാധിക്കുക. നീറ്റ് എം.ഡി.എസ് അപേക്ഷ വെള്ളിയാഴ്ച മുതല്‍ ഫെബ്രുവരി 12 വരെ നല്‍കാം.
എം.ബി.ബി.എസിന്റെ ഇന്റേണ്‍ഷിപ് പൂര്‍ത്തിയാക്കാനുള്ള തീയതി 2023 ആഗസ്റ്റ് 11 വരെയും ബി.ഡി.എസ് ഇന്റേണ്‍ഷിപ് തീയതി ജൂണ്‍ 30 വരെയും നീട്ടി നല്‍കി. മാര്‍ച്ച്‌ അഞ്ചിനാണ് നീറ്റ് പി.ജി പരീക്ഷ നിശ്ചയിച്ചിരിക്കുന്നത്. ഇത് രണ്ടു മാസത്തേക്ക് നീട്ടണമെന്ന് അപേക്ഷകരും ആരോഗ്യമേഖലയിലെ സംഘടനകളും കേന്ദ്ര ആരോഗ്യ മന്ത്രാലയത്തോട് ആവശ്യപ്പെട്ടിട്ടുണ്ടെങ്കിലും തീരുമാനമുണ്ടായിട്ടില്ല.