താനൂര്‍ ബോട്ട് ദുരന്തത്തിന് കാരണമായ മത്സ്യ ബന്ധന ബോട്ട് ഉല്ലാസ ബോട്ടായതിന് കാരണം സി.പി.എം സ്വാധീനമെന്ന് ബോട്ട് വിറ്റ ഇടനിലക്കാരന്‍. ബോട്ട് രാഷ്ട്രീയ സ്വാധീനം ഉപയോഗിച്ചാണ് സര്‍വീസ് നടത്തിയതെന്ന് ഇടനിലക്കാരന്‍ കബീര്‍ വെളിപ്പെടുത്തി. യാതൊരു രേഖകളും ഇല്ലാത്ത ബോട്ടിന് എല്ലാ രേഖകളും സംഘടിപ്പിക്കുമെന്ന് നാസറിന്റെ സഹോദരനും സി.പി.എം നേതാവുമായ ഹംസക്കുട്ടിയാണ് പറഞ്ഞത്. ഹംസക്കുട്ടിയും മന്ത്രി അബ്ദുറഹ്മാനും തമ്മിലുള്ള അടുത്ത ബന്ധമാണ് ബോട്ട് സര്‍വ്വീസിന് അനുമതി ലഭിക്കാനുള്ള കാരണം. തുറമുഖ വകുപ്പ് ഉദ്യോഗസ്ഥര്‍ തടഞ്ഞിട്ടും ഉന്നത ഇടപെടലാണ് ബോട്ട് നിര്‍മ്മാണത്തിന് സഹായകമായത്. 20 പേര്‍ മത്സ്യബന്ധനത്തിന് പോയിരുന്ന ബോട്ടാണ് ഉല്ലാസ നൗകയാക്കി മാറ്റിയത്.
തുറമുഖ വകുപ്പ് ഉദ്യോഗസ്ഥര്‍ ബോട്ട് നിര്‍മ്മാണം തടഞ്ഞിരുന്നെങ്കിലും ഉന്നത ഇടപെടല്‍ മൂലം നിര്‍മ്മാണം പുനഃരാരംഭിച്ചതായും കബീര്‍ പറഞ്ഞു. പുതുപൊന്നാനി പാലപ്പെട്ടിയില്‍ മത്സ്യബന്ധനത്തിനായി ഉപയോഗിച്ചിരുന്ന വഞ്ചി വാങ്ങുകയും പിന്നീട് ബോട്ടാക്കി മാറ്റുകയുമായിരുന്നു. 95000 രൂപക്കാണ് വഞ്ചി വിറ്റത്. ടൂറിസത്തിനാണെന്ന കാര്യം തനിക്കറിയില്ലായിരുന്നു. കുടുംബത്തിന് സഞ്ചരിക്കാന്‍ വേണ്ടിയാണ് ബോട്ടെന്ന് പറഞ്ഞു. നേരത്തെ ഹൗസ് ബോട്ടുകള്‍ വാങ്ങാന്‍ നോക്കി വില കൂടുതലാണെന്ന് പറഞ്ഞാണ് ഇവര്‍ ഫൈബര്‍ വള്ളം വാങ്ങിയതെന്നും കബീര്‍ വെളിപ്പെടുത്തി. സംഭവത്തിലെ യഥാര്‍ത്ഥ പ്രതി മന്ത്രിയാണെന്ന് വ്യക്തമാക്കുന്നതാണ് കബീറിന്റെ വെളിപ്പെടുത്തല്‍.