ആലപ്പുഴ: മാധ്യമ പ്രവര്‍ത്തകന്‍ കെ.എം ബഷീറിനെ വാഹനമിടിപ്പിച്ചു കൊലപ്പെടുത്തിയ കേസിലെ പ്രതി ശ്രീറാം വെങ്കിട്ടരാമനെ ആലപ്പുഴ ജില്ലാ കലക്റ്ററായി നിയമിച്ച സര്‍ക്കാര്‍ നടപടിയില്‍ വ്യാപക പ്രതിഷേധം. നിയമനത്തിനെതിരെ വിവിധ സംഘടനകള്‍ പരസ്യ പ്രതിഷേധവുമായി രംഗത്ത് എത്തി. കോണ്‍ഗ്രസ്, മുസ്ലിംലീഗ്, പത്ര പ്രവര്‍ത്തക യൂണിയന്‍, കേരള മുസ്ലിം ജമാഅത്ത് ഉള്‍പ്പെടെയുള്ള സംഘടനകളാണ് സര്‍ക്കാര്‍ നടപടിയെ അതി രൂക്ഷമായി വിമര്‍ശിച്ചത്.
അതേസമയം നിലവിലെ ജില്ലാ കലക്റ്ററും ശ്രീറാം വെങ്കിട്ടരാമന്റെ ഭാര്യയുമായ രേണു രാജിന്റെ മുഖചിത്രമുള്ള ജില്ലാ കലക്റ്ററിന്റെ ഔദ്യോഗിക ഫേസ്ബുക്ക് അക്കൗണ്ടിന്റെ കമെന്റ് ബോക്‌സ് പ്രതിഷേധത്തെ തുടര്‍ന്ന് പൂട്ടി. നിയമന വാര്‍ത്തക്ക് പിന്നാലെ വ്യാപക പ്രതിഷേധ കമെന്റുകളാണ് അക്കൗണ്ടില്‍ പ്രത്യക്ഷപ്പെട്ടത്. രേണു രാജിനെ എറണാകുളം ജില്ലാ കലക്റ്ററാക്കി മാറ്റി നിയമിച്ചിട്ടാണ് ശ്രീറാമിനെ ആലപ്പുഴയിലേക്ക് എത്തിച്ചത്. ദമ്പതികളെ അയല്‍ ജില്ലകളില്‍ നിയമിച്ചത് ഉള്‍പ്പെടെ ശ്രീറാമിന് സര്‍ക്കാര്‍ നല്‍കിയ സഹായങ്ങള്‍ ചൂണ്ടിക്കാണിച്ചാണ്‌വിമര്‍ശനങ്ങള്‍ പ്രത്യക്ഷപ്പെട്ടത്.