ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ തപ്പി തടയുന്ന ലിവര്‍പൂള്‍ വിടാന്‍ മുഹമ്മദ് സലാഹ് ഒരുക്കമല്ലെന്ന് അദ്ദേഹത്തിന്റെ ഏജന്റ്. യുവേഫ ചാമ്പ്യന്‍സ് ലീഗ് പ്രിക്വാര്‍ട്ടറില്‍ നിന്നും റയല്‍ മാഡ്രിഡിനോട് ദ്വിപാദ പോരാട്ടത്തില്‍ തോറ്റതിന് പിറകെ സലാഹ് സ്പാനിഷ് ലാലീഗയിലേക്ക് ചേക്കേറുമെന്ന വാര്‍ത്തകള്‍ വന്നിരുന്നു.
എന്നാല്‍ ലിവര്‍പൂളിന്റെ റെക്കോര്‍ഡ് ഗോള്‍വേട്ടക്കാരന്‍ അങ്ങനെ ചിന്തിക്കുന്നില്ലെന്നാണ് ഏജന്റ് റാമി അബ്ബാസ് വ്യക്തമാക്കിയത്. 2025 വരെ ഈജിപ്ത് താരത്തിന് ലിവറുമായി കരാറുണ്ട്. ആ കരാര്‍ താരം പാലിക്കുമെന്നാണ് അബ്ബാസ് പറയുന്നത്. സലാഹ് ലിവര്‍ വിടുമെന്ന വാര്‍ത്തകള്‍ എവിടെ നിന്നാണ് നിങ്ങള്‍ക്ക് ലഭിക്കുന്നത്… ? ഇതായിരുന്നു അബ്ബാസിന്റെ ട്വീറ്റ്. അവസാന സീസണിലാണ് സൂപ്പര്‍ സ്‌ട്രൈക്കര്‍ സാദിയോ മാനേയെ ലിവറിന് നഷ്ടമായത്. ജര്‍മന്‍ ക്ലബായ ബയേണ്‍ മ്യുണിച്ചിലേക്കാണ് അദ്ദേഹം ചേക്കേറിയത്. ബ്രസീലുകാരനായ മുന്‍നിരക്കാരന്‍ റോബര്‍ട്ടോ ഫിര്‍മിനോ ഈ സീസണിന് ശേഷം താന്‍ ലിവര്‍ വിടുമെന്ന് വ്യക്തമാക്കിയിട്ടുണ്ട്. സലാഹ് കൂടി പോയാല്‍ മുന്‍നിരയിലെ ത്രിമൂര്‍ത്തികളെല്ലാം പോവുന്ന അവസ്ഥയാവും.