വെസ്റ്റിന്‍ഡീസിനെതിരായ രണ്ടാം ഏകദിനത്തില്‍ ഇന്ത്യക്ക് തകര്‍പ്പന്‍ ജയം. 44 റണ്‍സിനാണ് ഇന്ത്യ വിജയിച്ചത്. ജയത്തോടെ മൂന്ന് മത്സരങ്ങളുള്ള ഏകദിന പരമ്പര ഇന്ത്യ സ്വന്തമാക്കി. ആദ്യം ബാറ്റ് ചെയ്ത ഇന്ത്യ 9 വിക്കറ്റ് നഷ്ടത്തില്‍ 237 റണ്‍സ് മാത്രമാണ് നേടിയത്. ഒരു ഘട്ടത്തില്‍ വലിയ വെല്ലുവിളി നേരിട്ട ഇന്ത്യയെ സൂര്യകുമാര്‍ യാദവിന്റെ 64 റണ്‍സും കെ.എല്‍ രാഹുലിന്റെ 49 റണ്‍സുമാണ് പ്രതീക്ഷ നല്‍കിയത്. കോഹ്‌ലിയും പന്തും 18 റണ്‍സ് വീതമാണ് എടുത്തത്. വെസ്റ്റിന്‍ഡീസിനായി ഒഡെയാന്‍ സ്മിത്തും അല്‍സാരി ജോസഫും രണ്ട് വിക്കറ്റ് വീതം വീഴ്ത്തി.
ചെറിയ വിജയലക്ഷ്യം മറികടക്കാന്‍ എത്തിയ വെസ്റ്റിന്‍ഡീസ് ഇന്ത്യന്‍ ബൗളര്‍മാര്‍ക്ക് മുന്നില്‍ വളരെപ്പെട്ടന്ന് തന്നെ മുട്ടുമടക്കേണ്ടിവന്നു. നാല് വിക്കറ്റ് നേടിയ പ്രസീദ് കൃഷ്ണയാണ് ഇന്ത്യയെ വിജയത്തിലേക്ക് എത്തിച്ചത്. ശര്‍ദുല്‍ താക്കൂര്‍ രണ്ട് വിക്കറ്റ് വീഴ്ത്തി.
44 റണ്‍സെടുത്ത ശമര്‍ ബ്രൂക്ക്‌സാണ് വെസ്റ്റിന്‍ഡീസിനെ തകര്‍ച്ചയില്‍ നിന്ന് രക്ഷിച്ചത്. ഒഡെയാന്‍ സ്മിത്ത് അവസാന ഓവറുകളില്‍ ചില ശ്രമങ്ങള്‍ നടത്തിയെങ്കിലും ഫലം കണ്ടില്ല. രോഹിത് ശര്‍മയുടെ നായകത്വത്തില്‍ ഇന്ത്യയുടെ ആദ്യ പരമ്പര കൂടിയാണ് ഇത്. പരമ്പരയിലെ അവസാന ഏകദിനം ഫെബ്രുവരി 11 നാണ്. മൂന്ന് ഏകദിനവും മൂന്ന് ടിട്വന്റിയുമാണ് പരമ്പരയില്‍ ഉള്ളത്.