അധികാര കേന്ദ്രത്തില്‍ ജനിച്ചിട്ടും അധികാരത്തോട് താല്‍പര്യം തോന്നിയിട്ടില്ലെന്ന് കോണ്‍ഗ്രസ് നേതാവ് രാഹുല്‍ഗാന്ധി. ഇന്ത്യയെന്ന രാജ്യത്തെ മനസ്സിലാക്കാനാണ് ശ്രമിച്ചതെന്നും അദ്ദേഹം പറഞ്ഞു. ഡല്‍ഹിയില്‍ വെച്ച് നടന്ന പുസ്തക പ്രകാശന ചടങ്ങില്‍ പങ്കെടുത്ത് സംസാരിക്കുകയായിരുന്നു രാഹുല്‍ ഗാന്ധി.
ചില രാഷ്ട്രീയക്കാര്‍ക്ക് അധികാരം നേടി ശക്തരാകുന്നതില്‍ മാത്രമാണ് താല്‍പര്യം. അവര്‍ രാവിലെ എഴുന്നേറ്റാല്‍ കൂടുതല്‍ അധികാരം നേടുന്നതിനെ പറ്റി ചിന്തിക്കുമെന്നും ഉറങ്ങുന്നതിന് മുന്‍പ് വീണ്ടും അതുതന്നെ ചിന്തിക്കുമെന്നും രാഹുല്‍ പറഞ്ഞു.
യുപി തെരഞ്ഞെടുപ്പിന് മുന്‍പ് മായാവതിയുടെ ബിഎസ്പിയുമായി സഖ്യം ഉണ്ടാക്കാന്‍ കോണ്‍ഗ്രസ് ശ്രമിച്ചിരുന്നു.എന്നാല്‍ മായാവതി അതിനോട് പ്രതികരിച്ചില്ലെന്ന് രാഹുല്‍ ഗാന്ധി പറഞ്ഞു. ആര്‍എസ്എസിന്റെ കൈയിലാണ് രാജ്യത്തിലെ ഭരണഘടനാ സ്ഥാപനങ്ങളെന്നും രാഹുല്‍ വിമര്‍ശിച്ചു.