ഐഎസ്എല്‍ ആദ്യപാദ സെമിയില്‍ കേരള ബ്ലാസ്റ്റേഴ്സിന് തകര്‍പ്പന്‍ ജയം. മലയാളി താരം സഹല്‍ നേടിയ തകര്‍പ്പന്‍ ഗോളിലാണ് ബ്ലാസ്റ്റേഴ്സ് ജംഷഡ്പൂരിനെ തകര്‍ത്ത് വിട്ടത്. ഇതോടെ ലീഗ് ഘട്ട മത്സരത്തില്‍ ജംഷഡ്പൂരിനോടേറ്റ കനത്ത തോല്‍വിക്ക് മറുപടി നല്‍കിയിരിക്കുകയാണ് ബ്ലാസ്റ്റേഴ്സ്. ലീഗില്‍ ഒന്നാംസ്ഥാനം കരസ്ഥമാക്കിയ കരുത്തരായ ജംഷഡ്പൂരിനെ തോല്‍പ്പിക്കാനായത് രണ്ടാം പാതയില്‍ ബ്ലാസ്റ്റേഴ്സിന് വലിയ ആത്മവിശ്വാസം നല്‍കും.
ഇരുടീമുകളും തകര്‍ത്താടിയ മത്സരത്തില്‍ 38ാം മിനുട്ടിലാണ് സഹലിന്റെ ഗോള്‍ പിറന്നത്. സഹലിന്റെ ഈ സീസണിലെ ആറാമത്തെ ഗോളായിരുന്നു അത്‌. ബ്ലാസ്റ്റേഴ്സ് ആക്രമണം നടത്തുന്നത്തിനിടെ ഗോള്‍ പോസ്റ്റിനടുത്ത് വച്ച് ജംഷഡ്പൂറിന്റെ പ്രതിരോധ താരം പിറകിലേക്ക് ഹെഡ്ഡ് ചെയ്ത് കൊടുത്ത പന്ത് ഓടിച്ചെന്ന് സഹല്‍ ഗോള്‍ കീപ്പര്‍ക്ക് മുകളിലൂടെ വലയിലേത്തിക്കുകയായിരുന്നു.മാര്‍ച്ച് 15 ചൊവാഴ്ച്ചയാണ് രണ്ടാം പാദം.