ഐഎസ്എല്ലില്‍ കേരള ബ്ലാസ്‌റ്റേഴ്‌സിന് തോല്‍വി. ഒന്നിനെതിരെ രണ്ട് ഗോളുകള്‍ക്കാണ് ഹൈദരാബാദിനെതിരെ ബ്ലാസ്‌റ്റേഴ്‌സ് തോറ്റത്. പ്ലേ ഓഫ് പ്രതീക്ഷ നിലനിര്‍ത്താന്‍ ജയം അനിവാര്യമായ മത്സരത്തിലാണ് ബ്ലാസ്‌റ്റേഴ്‌സിന്റെ തോല്‍വി. മുന്‍ ബ്ലാസ്‌റ്റേഴ്‌സ് താരം ഒഗ്ബച്ചെയാണ് ആദ്യ പകുതിയില്‍ തന്നെ ഹൈദരാബാദിനെ മുന്നിലെത്തിച്ചത്. മത്സരത്തിന്റെ 28ആം മിനുട്ടിലായിരുന്നു ഒഗ്ബചെയുടെ ആദ്യ ഗോള്‍. ബ്ലാസ്‌റ്റേഴ്‌സിന്റെ പ്രതിരോധത്തെ കാഴ്ച്ചക്കാരാക്കിയായിരുന്നു സൂപ്പര്‍ ഗോള്‍.
കളി കഴിയാന്‍ മിനുറ്റുകള്‍ ബാക്കിനില്‍ക്കെ 87 ആം മിനുട്ടിലാണ് ഹൈദരാബാദിന്റെ അടുത്ത ഗോള്‍. ജാവിയര്‍ സിവേരിയോയാണ് ആ ഗോള്‍ നേടിയത്. കേരളത്തിനായി ആശ്വാസ ഗോള്‍ നേടിയത് ബര്‍ബെറ്റോയാണ്. അവസാന മിനുട്ടിലായിരുന്നു ആ മറുപടി ഗോള്‍.
ജയത്തോടെ 35 പോയിന്റുമായി ഹൈദരാബാദ് പോയിന്റ് പട്ടികയില്‍ ഒന്നാം സ്ഥാനത്തെതി. ഇതോടെ ഹൈദരാബാദിന്റെ പ്ലേ ഓഫ് സാധ്യത ഏകദേശം ഉറപ്പായി. 27 പോയിന്റുള്ള ബ്ലാസ്‌റ്റേഴ്‌സ് അഞ്ചാം സ്ഥാനത്താണ്. ലീഗില്‍ മൂന്ന് മത്സരങ്ങളാണ് ഇനി ബ്ലാസ്‌റ്റേഴ്‌സിനുള്ളത്. ആയതിനാല്‍ ഇനിയുള്ള മത്സരങ്ങള്‍ നിര്‍ണായകമാണ്. അടുത്ത ബുധനാഴ്ച മുംബൈക്കെതിരെയാണ് ബ്ലാസ്‌റ്റേഴ്‌സിന്റെ അടുത്ത മത്സരം.