ഹൈദരലി ശിഹാബ് തങ്ങളുടെ മരണത്തില്‍ പാണക്കാടെത്തി അനുശോചനം രേഖപ്പെടുത്തി കോണ്‍ഗ്രസ് നേതാവ് രാഹുല്‍ ഗാന്ധി. സയ്യിദ് സാദിഖലി ശിഹാബ് തങ്ങളും പി.കെ കുഞ്ഞാലിക്കുട്ടിയുമാണ് രാഹുലിനെ സ്വീകരിച്ചത്. ‘വലിയ സങ്കടത്തോടെയാണ് ഇന്നിവിടെ എത്തിയത്. രാഷ്ട്രീയ നേതാവ് മാത്രമായിരുന്നില്ല, ആത്മീയ നേതാവ് കൂടിയായിരുന്നു ഹൈദരലി തങ്ങള്‍’, രാഹുല്‍ ഗാന്ധി പറഞ്ഞു. സോണിയ ഗാന്ധി തയ്യാറാക്കിയ അനുശോചനക്കുറിപ്പുമായാണ് രാഹുല്‍ ഗാന്ധി പാണക്കാട്ടെത്തിയത്. കെപിസിസി പ്രസിഡന്റ് കെ സുധാകരൻ, പ്രതിപക്ഷ നേതാവ് വി ഡി സതീശൻ, എഐസിസി ജനറൽ സെക്രട്ടറി കെ സി വേണുഗോപാൽ എന്നിവരും രാഹുൽ ഗാന്ധിക്ക് ഒപ്പമെത്തിയിരുന്നു. തങ്ങളോടുള്ള സ്‌നേഹം പ്രകടിപ്പിക്കാനായി തിരക്കുകള്‍ മാറ്റിവെച്ച് എത്തിയ രാഹുല്‍ ഗാന്ധിക്ക് സയ്യിദ് സാദിഖലി ശിഹാബ് തങ്ങള്‍ പ്രത്യേകം നന്ദി അറിയിച്ചു.